O Bergantiños, de Terceira División, lamentou a "falta de sensibilidade" do Deportivo por non cederlle o Estadio de Riazor para o partido de Copa do Rei que lle medirá ao Sevilla o 18 de decembro.
A Federación Española de Fútbol considerou o campo do Bergantiños "non apto" para o partido de Copa e o club da localidade coruñesa de Carballo pediu ao Deportivo que lle cedese Riazor, pero este non llo deixou por problemas co mantemento do céspede.
Nun comunicado, o Bergantiños critica a decisión do Deportivo de non "ceder Riazor para un dos días máis importantes" da "historia recente" do club.
"O apoio do bergantiñismo (club, socios e carballeses) ao Dépor foi sempre incondicional, en todas as circunstancias", explica o club de Carballo.
Neste sentido recorda "cando a entidade coruñesa traspasou a Angeliño (Ángel Esmorís) ao Manchester City, o Bergantiños renunciou ao dez por cento que lle correspondía por dereitos de formación do xogador de Coristanco porque entendemos a crítica situación do club amigo, inmerso nunha fase de concurso".
Tamén apunta que "noutro dos momentos delicados do Deportivo, a familia Calvo (propietaria dunha conserveira) e o Bergan cederon as instalacións para que o primeiro equipo coruñés puidese facer a pretemporada en Carballo".
Igualmente sostén que os directivos son socios do Deportivo e o club tamén cedeu xogadores da súa canteira sen pór ningún obstáculo.
O Bergantiños agradece "as mostras de apoio dos afeccionados deportivistas" e tamén das dos seguidores do Sevilla, "que levan días criticando a decisión da Real Federación Española de Fútbol de vetar As Eiroas para o partido de Copa".
O conxunto de Carballo terá que presentar unha alternativa á Federación Española antes das 14 horas deste luns.
