A campioa olímpica española Carolina Marín impúxose este martes á tailandesa Busanan Ongbamrungphan no seu debut no Mundial de Bádminton 2018, nun partido de dous sets (21-9, 21-8) que lle permitiu clasificarse directamente para oitavos de final, onde se enfrontará á xaponesa Sayaka Sato.
Sato (27 anos), número 17 do mundo e cabeza de serie número 15 no torneo, estreouse tamén este martes no torneo eliminando en dous sets (21-15, 21-11) á malasia Soniia Cheah, e medirase coa española este mércores, a unha hora que aínda está por determinar.
Pola súa condición de cabeza de serie, nin a onubense (número oito do mundo e sete no torneo) nin Sato tiveron que disputar a primeira rolda e xogaron este martes o seu primeiro partido na competición que se celebra en Nankín (ao leste do país).
Ongbamrungphan, de 22 anos e número 23 do mundo, saíu vitoriosa este luns (21-10 e 21-11) do enfrontamento ante a estadounidense Jamie Hsu, pero non conseguiu este martes bater á española.
Marín, de 25 anos, aterrou en China téndose proclamado recentemente campioa de Europa por cuarta vez (a terceira consecutiva) e busca saír vitoriosa en Nankín, tal e como o fixo en 2014 e 2015.
A campioa olímpica en Río 2016 é a principal baza española nos vixésimocuartos mundiais de bádminton, nos que xa foi eliminada en primeira rolda a madrileña Beatriz Corrales pola inglesa Chloe Birch.
No cadro masculino, os españois Pablo Abián e Luis Enrique Peñalver clasificáronse para a segunda rolda -que se celebrará este mércores-, na que se medirán cos indios Srikanth Kidambi e Bhamidipati Sai Praneeth, respectivamente.
