Carolina Marín revalida a súa coroa europea

A española Carolina Marín, dobre campioa do mundo e número dous do ranking mundial de bádminton, revalidou este domingo o seu título europeo ao vencer na final á escocesa Kirsty Glmour, segunda cabeza de serie, por 21-12 e 21-18 na localidade francesa da Roche sur Yon.

Cun balance de 4 vitorias e unha derrota fronte á escocesa, Carolina, actual número 2 do mundo, presentábase como favorita pero no último choque perdera fronte á británica, vixésima primeira do ranking mundial.

Con todo, a primeira manga resultou moi cómoda para a española. A partir do 4-4, Carolina foi aumentando a súa vantaxe ata lograr diferenzas moi confortables de seis e sete puntos para rematar con 21-12 en 16 minutos.

A segunda magna comezou co mesmo cariz. Marín adiantouse 5-1, pero a escocesa tomou a dianteira cun parcial de 5-0.

A onubense tivo que concentrarse ao máximo para atallar a reacción da británica, que gozou de vantaxes nunca superiores a dous puntos ata que Marín recuperou o dominio do xogo e púxose con cinco puntos de partido.

á terceira oportunidade (21-18), logo de 43 minutos de loita, alzouse coa medalla de ouro.

Carolina regresaba este sábado á final do torneo que, hai dous anos en Kazán (Rusia), deulle o seu primeiro gran éxito internacional, coa medalla de ouro.

O bádminton español xa fixera historia nestes Europeos de Francia ao clasificar a tres dos seus xogadores para os cuartos de final dun torneo continental. Beatriz Currais e Pablo Abián caeron na antepenúltima rolda.