O Compostela xogarase o ascenso ante o Salmantino

A SD Compostela xa coñece ao último rival que deberá superar para alcanzar o ascenso a Segunda División B: o Club de Fútbol Salmantino UDS.

O equipo, fundado no ano 2013 para substituír á desaparecida Unión Deportiva Salamanca, conseguiu o pase para o playoff de promoción como cuarto clasificado do grupo VIII de Terceira. Polo camiño na fase de ascenso eliminou ao Poblense e ao Mutilvera, e agora espera facer o propio co Compos, que se quedou como o único club galego inmerso na loita por subir a Segunda B tras a eliminación na rolda anterior do Rácing Vilalbés..

A ida, como todos os emparellamentos desta última rolda, disputarase esta fin de semana –días 16 e 17 de xuño– e a volta a seguinte, os días 23 e 24. Primeiro o Compostela deberá viaxar ao mítico Estadio Helmántico, decidíndose a eliminatoria en San Lázaro.

Os vencedores deste emparellamento xogarán a seguinte tempada en Segunda División B e acompañarán aos vencedores da ruta dos campións xa ascendidos: Internacional de Madrid, Real Oviedo B, Conquense, Ximnástica de Torrelavega, Calahorra, Espanyol B, Teruel, Atlético Malagueño e Don Benito.