Cristiano Ronaldo será o deportista mellor pago do mundo en 2016, segundo a revista Forbes, que elaborou un ranking no que o crack portugués desbanca da primeira praza ao boxeador Floyd Mayweather. Lionel Messi ocupa o segundo lugar do podio, cuns ingresos de 71, 5 millóns, por baixo dos 77,2 que percibirá o dianteiro do Real Madrid.
Forbes ten en conta tanto o soldo que perciben Cristano e Messi dos seus equipos como os ingresos publicitarios. O terceiro no ranking é Lebron James, a estrela dos Cleveland Cavaliers, que se embolsará 67,7 millóns este ano. É a primeira vez desde o ano 2000 que o deportista mellor pagado do planeta non é un boxeador ou o golfista Tiger Woods.
Se CR7 logra, aos seus 31 anos, a súa mellor posición histórica neste ranking, Messi tamén fai o propio coa súa escalada á segunda posición. Xa fóra do podio aparece o incombustible Roger Federer, con 59,5 millóns, ao que lle segue o baloncestita Kevin Durant (49,3 millóns). O top ten complétano Novak Djokovic (48,9 millóns), o xogador de fútbol americano Cam Newton (46,4 millóns), os golfistas Phil Mickelson (46,4 millóns) e Jordan Spieth (46,3 millóns) e o baloncestista Kobe Bryant, quen a pesar de retirarse ao termo da tempada NBA levará ao seu peto nada menos que 43,8 millóns.
