O exentrenador inglés Barry Bennell foi declarado culpable este martes por un tribunal inglés de 36 cargos de abusos sexuais a menores de idade na década de 1980.
Bennell, de 64 anos, exempleado do Crewe Alexandra e con vínculos próximos ao Manchester City e a varios clubs do noroeste de Inglaterra, foi condenado polo Tribunal da Coroa de Liverpool por abuso, violación e asalto a nenos de idades comprendidas entre os 8 e os 15 anos.
Durante a audiencia, o fiscal cualificou a Bennell, quen non estivo presente e prestou declaración por videoconferencia alegando enfermidade, de "depredador" e de "pederasta decidido" que abusaba sexualmente de nenos pequenos "a escala industrial".
Barry Bennell, que se cambiou o nome a Richard Jones, xa fora declarado culpable polo mesmo motivo en Reino Unido cando tiña 44 anos, tras admitir 23 cargos de abusos a nenos de entre 9 e 15 anos, cunha sentenza de nove anos de prisión.
En 2015 foi sentenciado a dous anos de cárcere por abusar dun neno de 12 anos nun campamento de fútbol na localidade de Macclesfield (noroeste de Inglaterra).
