O persoal de técnicos e xogadores regresou das vacacións tras non poder conseguir o ascenso ao fútbol profesional e co obxectivo de subir de categoría no curso actual. Con nove incorporacións ata a data, cambio de adestrador e de dirección deportiva, o conxunto coruñés citouse no Estadio Abanca-Riazor.
Na bancada de Tribuna, comezou a xornada cun sinxelo acto de presentación ao aire libre pola complicada situación sanitaria derivada da pandemia. Segundo explicou o Deportivo, David Villasuso, director Xeral e conselleiro do Deportivo, tomou a palabra en primeiro lugar para dar a benvida e desexar a todos os presentes "moita sorte, que será a sorte do club tamén".
O mesmo directivo firma o escrito que o Deportivo trasladou aos xogadores e empregados para comunicarlles o procedemento de extinción de emprego que iniciou o club. Juan Giménez, adxunto á secretaría técnica que comanda desde hai unhas semanas Carlos Rosende, dirixiuse ao grupo cun breve discurso co obxecto de reiterar todo o apoio do club a técnicos e futbolistas. Finalmente, Borja Jiménez, novo adestrador do equipo, trasladou aos seus xogadores que "coa ilusión non se negocia".
No primeiro día de traballo foron citados Álex Bergantiños, Valín, Borja Galán, Claudio Beauvue, Pablo Brea, Gandoy, Fede Cartabia, Borja Celeiro, Salva Ruiz, Villares, Juan Rodríguez, Ian Mackay, Rafa de Vicente, Adrián Lapeña, Diego Aguirre, Miúdo, Pablo Trigueros, Caveira, William de Camargo e Alberto Quiles.
A eles uniuse o canteirán Iván Guerreiro, mentres que Diego Rolan, Keko Gontán, Héctor Hernández -confinado por covid-19-, Uche, Adri Castro e Alberto Sánchez non estiveron presentes, con permiso do club, así como Celso Borges, concentrado coa selección de Costa Rica. Tras as presentacións deste xoves e as probas médicas, o Deportivo someterá aos seus xogadores a probas físicas este venres e empezará os adestramentos o luns da próxima semana na Cidade Deportiva de Abegon.
