O Deportivo pechou o traspaso do central grego Vasilios Lampropoulos ao Bochum alemán, no que xogou cedido polo conxunto coruñés desde o mercado invernal.
O club galego deséxalle a "maior das sortes" na continuación do proxecto profesional ao que se uniu en febreiro e agradécelle "o seu traballo mentres defendeu" as súas cores.
Lampropoulos disputou 18 partidos oficiais co Deportivo, 17 en LaLiga SmartBank, desde que chegou ao club o pasado verán procedente da AEK co que acabara o seu contrato.
O central, que foi internacional coa selección absoluta grega, comprometeuse entón co Deportivo ata o 30 de xuño de 2021.
O primeiro xogador grego que pertenceu ao club coruñés formouse nas categorías inferiores do Olympiacos, iniciou a súa carreira profesional no Apollon Pontou, regresou ao equipo no que se formou, e continuou no Asteras Tripoli, o GS Ilioupolis, o Panionios e a AEK.
Lampropoulos superou unha lesión de xeonllo en 2017 e na tempada 2018/19 non tivo protagonismo co seu equipo desde novembro ao haberse negado a continuar na AEK.
A primeira fichaxe do Deportivo na tempada 2019/20, aínda con Carmelo do Pozo como director deportivo, foi titular nas nove primeiras xornadas con Juan Antonio Albacete Anquela como adestrador e tamén gozou de bastante protagonismo co segundo técnico que tivo o equipo, Luís César Sampedro.
Con todo, co terceiro, Fernando Vázquez, non chegou a ter minutos e foi cedido ao Bochum, ao que agora defenderá xa en propiedade.
