O Gran Premio de Rusia de Fórmula Un comezou este domingo de xeito atípico e con algo de atraso polo enésimo contratempo no coche de Fernando Alonso.
O piloto español nin sequera puido comezar a carreira. O seu McLaren quedou parado durante a volta de formación, polo que a cuarta proba do Campionato do Mundo de Fórmula Un empezou con algo de atraso tras a decisión da organización de abortar a saída.
Alonso detectou un fallo no seu motor -concretamente no ERS do propulsor, segundo o propio asturiano-, e informou por radio do incidente, que finalmente lle deixou sen participar nun Gran Premio que por outra banda non se presentaba nada alentador para el.