O gardameta costarriqueño Keylor Navas, que recollerá o próximo 10 de xaneiro un dos Premios Nacionais do Deporte, o Trofeo Comunidade Iberoamericana, farao coa noticia de que renovou o seu contrato unha tempada máis co Real Madrid, ata 2021.
A decisión, anunciada no programa Jugones da Sexta, demostra a vontade de Keylor Navas de manterse no conxunto branco a pesar de perder a titularidade esta tempada en favor do belga Thibaut Courtois, chegado ao club no verán procedente do Chelsea.
Ao tico de 32 anos vinculóuselle co Arsenal, un rumor que o técnico español Unai Emery valorou así este xoves en rolda de prensa: "Nunca falamos sobre un porteiro porque estamos moi felices cos tres que temos agora. Nunca falamos sobre Navas", dixo.
O costarriqueño chegou ao Real Madrid procedente do Levante a cambio de 10 millóns de euros no verán de 2014 e, tras unha tempada na que foi suplente de Iker Casillas, fíxose coa titularidade da portería madridista na que foi un alicerce importante nos éxitos do equipo.
Keylor Navas acumula no Real Madrid un palmarés de tres Ligas de Campións, unha Liga, catro Mundiais de Clubs, tres Supercopas de Europa e unha Supercopa de España.
