O Verán HQR! é un non parar. Desde o pasado luns, 65 nenos e nenas de todas as idades, desde os oito ata os 15 anos, gozan en Manzaneda de certa normalidade grazas a unha experiencia polideportiva co HQR!Camp.
Vivimos en tempos atípicos nos que o desenvolvemento dos máis novos vese influído polas consecuencias da Covid. Por isto, segundo a organización, é aínda máis importante o labor de este tipo de actividades onde os nenos e nenas volven xogar e divertirse cos seus amigos e amigas.
A diversión tamén vai ligada á prudencia e, a pesar de que se lles fixeron tests PCR e antígenos, a organización tomou medidas para evitar calquera posible contaxio no propio campamento. Por exemplo, os nenos e nenas do HQR! Camp están organizados para gozar de todas as actividades en grupos de 15.
A Covid estivo presente na cabeza da organización desde o momento no que se deu o primeiro paso para celebrar o evento. De feito, a organización decidiu facer a actividade en Manzaneda, e non en Pontevedra, pola pandemia. Así, puidéronse crear verdadeiros grupos burbulla para evitar calquera contacto que poida provocar un brote. "Nos dez anos que levo organizando o campamento, este foi o máis complexo", comenta o coordinador do HQR!, David Acevedo, que mestura a alegría por poder celebrar a décima edición do campamento polideportivo coa prudencia de estar pendente en todo momento dos protocolos sanitarios.
A pesar da dificultade inicial, este campamento era "necesario" para todos estes nenos e nenas que xa tiñan ganas de que chegase o primeiro día e vivir dentro dunha normalidade aparente. E é que o paso da pandemia nótase nas actitudes e comportamentos dos nenos que agora se mostran "algo máis reservados", segundo Acevedo. Por esta razón, os valores que transmite a filosofía HQR! e o deporte son agora máis relevantes. A solidariedade, respecto, compañeirismo, sacrificio e diversión son agora máis relevantes.
DÍA A DÍA. Unha xornada habitual do HQR! Camp comeza ás 8.45 horas, cando os 65 participantes espértanse para almorzar e estar listos ás once menos cuarto para o primeiro deporte do día. ás 14.15 é a comida, pero antes gozan dun tempo na piscina, e xa ás 16.00 retómanse as actividades. ás 20.00 da tarde volven ao campamento para ducharse, cear e arranxarse para unha velada nocturna.
Nos catro días que levan xa de campamento, xa realizaron deportes de todo tipo: desde balonmán, voleibol, beisbol ou baloncesto ata orientación fotográfica ou pelota canadense –deporte no que dous equipos buscan chegar á zona de anotación, parecido ao rugby ou ao fútbol americano–. E aínda lles espera máis diversión con BTT ou bádminton durante este venres. Este sábado os e as participantes formarán parte dunhas olimpíadas para encarar unha última xornada que rematará co acto de clausura.
