O exinternacional de Países Baixos e xogador do Groningen Arjen Robben anunciou este xoves que colgará as botas aos 37 anos de forma definitiva debido aos seus problemas físicos, unha decisión que cualificou como "difícil, xusta e realista".
Robben explicou, na súa conta verificada de Twitter, que logo dos últimos partidos da tempada comezou a adestrar de novo "para manter a forma física", pero que o seu corpo non lle deu "nin boas sensacións nin a confianza que necesitaba".
O xogador xa anunciou a súa retirada por primeira vez en xullo de 2019, cando militaba no Bayern Múnic, pero sorprendeu ao mundo do balompé cando anunciou en xuño de 2020 a súa volta para xogar no Groningen, o modesto equipo da primeira división neerlandesa no que se formou.
No entanto, os problemas físicos fixéronlle perderse case toda a tempada, pois só xogou 173 minutos repartidos en seis partidos, unha circunstancia que Robben definiu como "decepcionante".
Robben despediuse dos afeccionados do Groningen desexándolles "boa saúde" e "unha gran tempada de fútbol nos estadios cheos".
O exinternacional neerlandés, que vestiu a camiseta do seu país en 96 ocasións e foi subcampión no Mundial de Sudáfrica 2010, deixa a súa carreira cun gran palmarés tras pasar por clubs como o PSV Eindhoven, o Chelsea, o Real Madrid, e o Bayern de Múnic.
