O trofeo que acredita ao campión do Teresa Herrera será igual para homes e mulleres desde o próximo ano, segundo anunciou o Concello da Coruña, que é quen organiza, xunto ao RC Deportivo, o torneo futbolístico que este sábado alcanza a súa septuaxésimo cuarta edición en categoría masculina e a sétima na feminina.
Este será, pois, o último ano no que a réplica da Torre de Hércules que se entrega ao gañador do torneo masculino sexa máis grande que a que levan as vencedoras do feminino.
O Concello explicou en comunicado os trofeos deste ano xa estaban contratadas polo anterior Goberno local, polo que non puideron ser modificadas.
A alcaldesa da Coruña, Inés Rey, e parte da corporación municipal recibiron este sábado no Palacio de María Pita aos representantes dos equipos que compiten no torneo. Rafael Gordillo, director de relacións institucionais do Betis, desexou ao Deportivo "moitísima sorte nesta etapa de ascenso a Primeira División".
O presidente do RC Deportivo, Paco Zas, recordou que este ano, no mes de outubro, a cidade celebrará o 75 aniversario da construción do estadio de Riazor, que acolle desde hai 74 anos o Trofeo Teresa Herrera.
Inés Rey insistiu, unha vez máis, na intención do Concello de que o equipo feminino do Deportivo, recentemente ascendido á Primeira División, xogue os seus partidos en Riazor. "Só espero que sexa o principio de algo que se repita, porque elas piden un continente do tamaño do seu talento e o estadio ten que ser tamén a súa casa e a casa de todas e todos, á que volvemos para vivir outra tarde maratoniana do Teresa Herrera", asegurou a rexedora.
