A Uefa abriu expediente disciplinario ao portugués Cristiano Ronaldo, dianteiro da Juventus, polos xestos que fixo tras eliminar ao Atlético de Madrid nos oitavos de final da liga de Campións. Segundo informa este luns a Uefa este expediente ábrese de acordo ao artigo 55 do Regulamento de Ética e Disciplina tras a investigación levada a cabo por un inspector.
Os cargos contra Cristiano, segundo a comunicación do organismo europeo, son conduta inadecuada. O Comité de Control, Ética e Disciplina tomará unha decisión sobre este caso o próximo 21 de marzo.
Cristiano Ronaldo foi protagonista cun triplete para eliminar ao Atlético e, ao acabar o partido, celebrouno cun xesto obsceno, imitando, de xeito evidente, o que realizara na ida o técnico branquivermello, o arxentino Diego Pablo Simeone. Nese caso, a Uefa sancionou ao Cholo Simeone con 20.000 euros por conduta inapropiada.
Massimiliano Allegri, técnico da Juventus de Turín, asegurou o pasado sábado que non teme que o portugués Cristiano Ronaldo sexa sancionado polo xesto que fixo e que confiaba en que poida participar sen problemas na eliminatoria de cuartos ante o Ajax de Amsterdam.
"Creo que o martes cada un celebrou de xeito distinto. No estadio había 42.000 afeccionados, deberían sancionar a todos. Non me parece algo particular (a celebración de Cristiano). Non temos medo dunha sanción, e non a haberá", afirmou Allegri na rolda de prensa previa ao cruzamento ligueiro contra o Xénova.
