¿Unha Volta sen Galicia?

A mocidade de Juan Ayuso e Carlos Rodríguez batallando co maduro Enric Mais polo trono do ciclismo español. A opción de Remco Evenepoel dando un paso máis cara a unha fama ao que parece abocado. A redención de Egan Bernal, que pode vestirse co traxe de ave fénix tras rozar a morte baixo o chasis dun autobús. Richard Carapaz retornando a ser quen foi, agora vestido co rosa do EF norteamericano. Primoz Roglic alcanzando a Heras como recórdman de triunfos ou a primeira de Vingegaard ou Pogacar nun palmarés que xa ten unha Grande boucle. Todo iso pode pasar en LaVuelta 2023 sen que Galicia sexa testemuña directa. ¿Ou si?

A terceira gran proba por etapas do calendario Uci podería evitar, por segundo ano consecutivo, pisar terras galegas. Pontevedra estaría obrigada a seguir o atractivo da rolda española pola televisión, sen acudir a pé de asfalto para aplaudir o esforzo dos corredores, sobre todo se se cumpren as previsións que indican que non rodarán na comunidade do noroeste.

Salvo sorpresa -para nada descartable- o próximo 10 de xaneiro na presentación da competición por parte da organización encabezada por Unipublic, LaVuelta irá por outros lados. Terá un inicio menos cosmopolita e o final no sempiterno Madrid.

Prometeu máis montaña e espectáculo a súa cabeza visible, Javier Guillén. O director da proba certificou que será "máis espectacular polo percorrido". "A montaña decidirá a Volta, sen dúbida, pero na última semana poderá pasar de todo, haberá un crono individual, etapas con portos, outro modelo clásica", comentou Guillén, quen detallou que haberá en total 7 finais no alto.

Segundo os principais mentideros, ningún dese septeto de metas esixentes estará Galicia. Nesas cotas que fagan disparar o desnivel dos GPS estarán cimas míticas como o Tourmalet ou o Angliru.

Eses dous cumes serán os nomes propios dunha proba na que os ciclistas sufrirán en Francia, Andorra e Asturias, pelexarán contra o crono, rodarán pola costa mediterránea e loitarán contra o vento castelán.

Arrincará máis tarde do habitual. O cambio de data dos Mundiais de ciclismo -que pasarán de finais de setembro a mediados de agosto en Glasgow- desprazou a saída da rolda española ao 26 do segundo mes de verán. Non haberá banderazo noutro país. Será en Barcelona, cunha sempre esixente crono por equipos para empezar tres semanas de sufrimento e goce a partes iguais.

Cataluña será o espazo para os primeiros días, nos que a montaña aparecerá pronto, cando LaVuelta chegue a Andorra na terceira etapa.

Tras visitar o Principado, a caravana ciclista tomará rumbo sur, co Mediterráneo á súa esquerda. Aí pasarán Tarragona, Castelló, Valencia e Alacante para que os esprinters e os aventureiros teñan o seu momento de gloria, para que levanten os brazos e se enfunden a camisola verde da regularidade.

A montaña mediterránea podería ter o seu oco coa ascensión ao porto de Miserat, en Pego, provincia de Alacante.

Esixente será Collado, situado en Murcia, un porto pesado, sen grandes ramplas, pero con 26 quilómetros de subida.

Tras abandonar a terra dun dos máis grandes: Alejandro, algúns medios especializados sitúan a ruta a seguir cara ao centro da península -Ávila é e o Guadarrama son firmes candidatas- antes de tomar dirección norte, cara a unha das grandes citas da carreira: a Col do Tourmalet, cuxa data de subida será o 9 de setembro.

O Pirineo será protagonista nas cotas navarras. Na Comunidade Foral ascenderase tamén San Miguel de Aralar antes de tomar rumbo a Valladolid.

Tras pelexar contra o vento castelán xurdirán as cimas asturianas. Os Lagos de Covadonga, o Angliru ou o Cuitu Negro poden ser finais das tres etapas que se esperan decisivas en terras astures antes de acabar na Castellana co xersei vermello no alto do podio.