Os Xogos Olímpicos de Tokio, na corda frouxa polo coronavirus

O Comité Olímpico Internacional (COI) pronunciarase en tres meses sobre se se celebran os Xogos Olímpicos de Tokio 2020, tal e como estaban previstos, debido ao coronavirus, segundo confirmou este martes Dick Pound, o membro máis antigo do organismo. 

Pound estima que deben esperar "unha fiestra de tres meses" para decidir o destino dos Xogos Olímpicos de Tokio, que están a ser ameazados polo virus de rápida propagación en China. "Todo tería que seguir como sempre", dixo nunha entrevista a Associated Press. 

A mensaxe de Pound, membro do COI desde 1978, non foi alarmista, pero si recoñeceu con franqueza os riscos que afronta a cita olímpica que comeza o 24 de xullo. "Esta é a nova guerra e tes que enfrontala. Diría que a xente terá que preguntar: "¿Está isto baixo o control suficiente para que podamos confiar en ir a Tokio, ou non?", cuestionouse. 

Pound recoñece que "mudarse a outra cidade" é unha opción que parece "pouco probable"

Os Xogos Olímpicos modernos datan de 1896 e desde entón só se cancelaron durante as Guerras Mundiais —precisamente, en Tokio debeu celebrarse en 1940—, ademais enfrontáronse a diferentes boicots ao longo da súa historia: en 1976 en Montreal, en 1980 en Moscova e en 1984 en Los Ángeles. "É unha gran, gran, gran decisión e non podemos tomala ata que teñamos datos fiables nos que basearnos", dixo Pound, explicando que "calquera consello que o COI está a recibir agora" sobre o coronavirus e o seu posible impacto a pesar de tratarse doutro país diferente á orixe da enfermidade, "non require a cancelación ou o adiamento dos Xogos Olímpicos", tranquilizou. 

"Simplemente non se pospón un evento do tamaño e a escala dos Xogos Olímpicos deste xeito (...) En realidade non podemos dicir que faremos nuns meses". Ademais, Pound recoñeceu que "mudarse a outra cidade" é unha opción que parece "pouco probable". "Mover o lugar é difícil porque hai poucos sitios no mundo capaces de preparar as instalacións nese curto período de tempo", sentenciou.