Yeray recae do seu tumor

O central do Athletic Yeray Álvarez deberá recibir quimioterapia e será baixa uns tres meses tras serlle detectada unha anomalía na última revisión do tumor testicular que sufriu o ano pasado, segundo informou o club bilbaíno.

O xogador pasou este luns, 12 de xuño, o último dos controis previstos dentro da vixilancia activa da evolución do tumor testicular que se lle detectou e se interveu cirurxicamente en decembro de 2016.

Segundo explicou o club, no control radiolóxico detectóuselle unha anomalía, en concreto unha adenopatía, unha inflamación dos ganglios linfáticos. Debe ser tratada, polo que nos próximos días o xogador comezará un tratamento complementario con quimioterapia, indicado polos especialistas.

O xogador abandonará este martes a concentración da selección española sub-21. O período estimado de baixa será de aproximadamente tres meses.
Do mesmo xeito que se fixese no momento de coñecerse a súa enfermidade, o Athletic Club ponse a disposición de Yeray Álvarez e solicita respecto e discreción para coa intimidade do xogador e os seus achegados.