O Pavillón Municipal dos Deportes de Pontevedra acollerá a cerimonia inaugural do Campionato do Mundo Júnior de balonmán que comezará o 16 de xullo, mentres que o Pavillón das Travesas de Vigo será o escenario da gran final, que se disputará o 28 de xullo.
Ademais, Pontevedra tamén será sede do primeiro partido da fase de grupos do combinado nacional, que se disputará o 16 de xullo ás 21.00 horas con Estados Unidos como rival. Os demais encontros do grupo A, incluídos os outros catro que deberá afrontar o combinado nacional, desenvolveranse na cidade olívica.
Pontevedra será a sede dos grupos C e D do torneo, que son, a priori, os máis igualados. No C están encadrados unha das grandes favoritas ao título, a emerxente selección de Portugal, ademais de Croacia, Hungría, Brasil, Bahrein e Kósovo. No D competirán Alemaña, Islandia, Noruega, Arxentina, Dinamarca e Chile.
Ademais, Pontevedra tamén presenciará catro oitavos de final nos que tomarán parte o primeiro e o terceiro clasificados do grupo A, no que competirá España, e dous cuartos de final, os que se debuxarán cos vencedores dos catro oitavos de final que terán lugar na cidade do Lérez.
A IHF aceptou a proposta acordada polas institucións implicadas na organización do evento e fixo oficial este mércores o calendario definitivo do torneo, no que se atendeu as demandas de Pontevedra, que espera poder gozar da selección española entre oitavos de final e as semifinais, se a competición resulta favorable aos intereses hispanos.
Así, Pontevedra acollerá as dúas semifinais, mentres que a loita polas medallas se trasladará a Vigo.
O Mundial comezará oficialmente coa disputa dos encontros entre Alemaña e Arxentina no grupo D, en Pontevedra (16 de xullo, ás 10.00 horas), e Francia-Nixeria, no grupo B, á mesma hora do mesmo día en Vigo.
Os horarios dos encontros durante a fase de grupos serán a 16.00, 18.00 e 20.00 horas todos os días (entre o 16 e o 22 de xullo) e ademais, as 10.00, as 12.00 e as 14.00 horas na xornada inaugural, a terceira xornada (o 19 de xullo) e a quinta (22 de xullo).
Os horarios cambiarán sensiblemente nas eliminatorias e a fase de definición da clasificación das eliminadas nos grupos e as sucesivos cruces.
Cabe recordar que España estará encadrada no grupo A, xunto a Eslovenia, Serbia, Tunisia, Xapón e Estados Unidos e que no grupo B, o outro que acollerá Vigo, competirán Francia, Exipto, Suecia, Nixeria, Corea e Austria.
O torneo terá dúas xornadas de descanso, logo da fase de grupos, o 23 de xullo, e tras os cuartos de final, o 26 de xullo.
