O Arxil deixou pasar o primeiro tres para conseguir selar a permanencia ao caer 68-60 en casa dun HGB Ausarta Barakaldo xa salvado e con pouco en xogo máis aló da honra de conseguir outra vitoria. O poste baixo, tanto en ataque pola súa falta de efectividade, como en defensa, pola facilidade coa que deixou anotar ao seu rival (28 puntos fronte a 18 na pintura), pesou moito máis que os 27 puntos dunha Sara Castro que foi o faro do equipo.
A pírrica anotación do primeiro cuarto evidenciou o nerviosismo do equipo pontevedrés, especialmente nuns primeiros minutos con pouca fluidez a nivel ofensivo. Unha serie de boas defensas evitaron que o Ausarta se afastase no marcador. Con Forster moi vixiada, quen só rexistrou un acerto de catro intentos no primeiro cuarto, a escolta Sara Castro converteuse no baluarte ofensivo do seu equipo con oito puntos logrados grazas a un triplo e varias penetracións que se materializaron en tiros libres.
A pesar dun bo arranque nos primeiros minutos do segundo cuarto, as xogadoras locais aproveitaron varios erros defensivos das pupilas de Maite Méndez para adiantarse novamente no marcador cun parcial de 6-2. Un tiro a media distancia de Moreira e un triplo de Natalia López, que anteriormente anotara un dos tiros libres dunha antideportiva, devolveron a vantaxe ao equipo pontevedrés (20-22).
Pero tres triplos –un de Aina Vergara e dous practicamente consecutivos de Karamovic- permitiron ao bando anfitrión coller unha boa vantaxe (29-22) que Carla e dous tiros libres de Sara encargáronse de reducir antes do descanso (30-26). No terceiro cuarto, un triplo tras saír dun bloqueo de Sara Castro e unha bandexa de Natalia López permitiron ao Arxil manter o pulso do partido, pero unha serie de malas defensas provocou un novo parcial de 9-2 que afastou novamente ao rival no marcador (39-32).
En busca da reacción do seu equipo, Maite solicitou un tempo morto e as súas xogadoras responderon. Catro puntos de Noelia Masiá e un triplo de Sara valeron para conseguir o empate a 41, a falta dun minuto para a conclusión do terceiro cuarto, pero unha canastra de Romeu permitía ao Ausarta afrontar o último cuarto cunha lixeira vantaxe no marcador (43-41).
Outra serie de desconexións defensivas do Arxil permitiu ao bando vasco abrir oco no marcador grazas a un triplo de Karamovic e cinco puntos de Ortega (54-45) nos primeiros compases do último período. Dous tiros libres de Sara Castro e un tiro a media distancia de Omerbasic, tras un pase por detrás de Díaz-Pache, permitiron soñar ao Arxil con remontar o partido, pero un parcial de 10-5 e o acerto nos tiros libres decisivos de Laura Chahrour esfumaron toda posibilidade de poder darlle volta ao marcador a falta de dous minutos para concluír o partido.
"Non estivemos intensas e tampouco acertadas no tiro"
A adestradora do CB Arxil, Maite Méndez, foi moi clara ao concluír o partido e asegurou que "dilapidaran" a primeira opción para lograr a salvación.
Así mesmo, asegurou que o seu equipo non puido despregar o seu habitual xogo de transicións "rápidas" e que permitira ás rivais "defender moi colocadas". Recalcou que ao seu equipo, ademais, faltáronlle varias características naturais que lle permitiu obter vitorias en compromisos anteriores: "Non estivemos intensas e non estivemos acertadas no tiro".
Na roda de quecemento notaron que "un aro estaba máis levantado", pero non evadiu a autocrítica e asegurou: "Debaixo do aro tivemos situacións moi claras e quedáronse curtas".
"A pesar de que apertamos o acelerador e puidemos recuperar algún balón, permitimos diagonais fáciles que lles permitiu sumar puntos. Foi clave", explicou a máxima responsable do banco do cadro pontevedrés, que remarcou que o forte do seu equipo está na retagarda: "Nós somos un equipo defensor e temos que aproveitar as nosas vantaxes arriba".
"Habemos empezado con malas porcentaxes. No terceiro cuarto entoámonos un pouco, que ela tampouco estiveron moi ben, pero foron máis efectivas", concluíu Maite Méndez.
