A fronteira entre o soño e a realidade é tan difusa que se pode atravesar en calquera minuto dun partido. O Pontevedra habita nela a seis xornadas do final da tempada. 90 minutos poden desprazar ao equipo granate cara a un lado ou outro da liña. Unha xogada, un segundo ou un gol poden cambiar a dimensión na que se move o once granate e achegalo á realidade do play-off, que ata a data sempre foi parte do territorio onírico.
O cadro de Luismi leva 32 xornadas asistindo á batalla polos catro primeiros postos desde fóra. Viu a porta pechada medio ano e entreaberta a outra metade, pero nunca puido atravesala. Para logralo, para que a promoción se converta nunha certeza, debe lograr o seu cuarto triunfo seguido fronte a un complicado adversario, o Coruxo.
O once de Luismi atópase nunha dinámica difícil de mellorar. Superou unha das súas maiores crises emocionais do exercicio con tres vitorias seguidas, a última delas fronte ao San Sebastián de los Reyes nun enfrontamento que rozou a perfección e subiu a moral das tropas.
A fase de ascenso está a un só punto de Pasarón e a irregularidade de todos os rivais nos tempos recentes fai concibir esperanzas dun futuro mellor pero, para que as expectativas se cumpran, antes o Pontevedra deberá bater á escuadra máis estable dos últimos tempos.
E é que o Coruxo non perdeu aínda no que vai de segunda volta. Os vigueses levan trece xornadas sen perder, pero están lonxe dos mellores porque empataron demasiados enfrontamentos: 16, a metade dos que disputaron.
O once dos irmáns Montes non poderá contar con Antón de Vicente, xogador versátil como poucos da categoría, pero si terá o seu arsenal de talento para o xogo combinativo. No Pontevedra é improbable que xogue Álex González, con molestias musculares tras o seu esforzo contra o San Sebastián de los Reyes.
O partido xogarase no campo e nas bancadas, nas que haberá un par de centenares de seguidores granates dispostos a converter un soño en realidade.
