A gran cita do fondo

Innovar para que siga sendo unha referencia. Esa frase resume perfectamente a edición deste ano do medio Maratón CaixaBank de Pontevedra, que amplía a súa oferta deportiva co nacemento dunha proba de dez mil metros e que potencia o seu aspecto social reforzando aspectos como animación, recoñecemento aos participantes ou clausura.

Na procura de seguir potenciándoa a Sociedade Ximnástica, organizadora da mesma, recuperou o nome da proba que deu pé nos anos noventa ao Medio Maratón, polo que a partir de agora se denominará Gran Fondo CaixaBank tal como se explicou na presentación celebrada este martes no Concello de Pontevedra nun acto no que o concelleiro de Deportes, Agustín Fernández, estivo acompañado pola presidenta da Ximnástica, Charo Castro; o director da proba Víctor Riobó; o xefe provincial de Deportes da Xunta, Daniel Benavides; a directora de área de CaixaBank en Pontevedra, Cristina Vega, e o subtenente da Brilat José Juan González Costado.

Tal e como explicou Víctor Riobó, o Medio Maratón de Pontevedra é unha carreira popular que chega este ano á súa XXIV edición, aínda que o comezo do Campionato Galego de Gran Fondo —antecesor do medio maratón— se produciu en 1977, con motivo do 50 aniversario da Sociedade Ximnástica, cunha distancia de 20 km.

O antecedente: Campionato Galego de Gran Fondo

Aproveitando as características do circuíto, o evento inclúe este ano, como principal novidade, unha proba de dez quilómetros na que poderá participar todo aquel que non se atreva fisicamente co medio que conta cun circuíto de 21.097 metros homologado pola Real Federación Española de Atletismo (RFEA) e traducirase en dúas voltas de 10 km. que pasan por centro da cidade do Lérez e o seu centro histórico.

A carreira terá como saída e centro neurálxico a contorna do Ponte dos Tirantes, cun percorrido practicamente chan que discorre en gran parte pola contorna do río Lérez e que sitúa a súa chegada no Centro Galego de Tecnificación Deportiva, permitindo aos participantes gozar da experiencia de atravesar a liña de meta como os grandes atletas, dentro dunha pista de atletismo.

O percorrido transcorre por lugares emblemáticos da cidade, como A Peregrina, Santa María ou Arcebispo Malvar. O medio maratón dará comezo ás 11 horas, mentres que a proba de 10 km comezará 20 minutos antes, ao redor das 10.40 horas coa finalidade de evitar molestias e aglomeracións en determinados puntos do circuíto.

A organización conta con superar nesta edición os 1.500 inscritos

Ademais de contar con duchas no Pavillón Universitario e o Centro Galego de Tecnificación Deportiva, a organización obsequiará cunha medalla finisher e unha camiseta aos participantes, instalará unha pantalla xigante que permitirá ver o evento en streaming e celebrará, grazas á colaboración da Concellería de Promoción Económica unha festa final cun pequeno concerto.

AUMENTO. A organización conta con superar nesta edición os 1.500 inscritos, unha cifra que significaría rebasar a inscrición dos dous últimos anos dunha proba que ten a marca nos 1.792 de 2016.

O responsable de Deportes de Pontevedra, Agustín Fernández, asegurou que o medio "se vai reafirmando, ano tras ano, paso a paso, como unha das probas atléticas máis populares de Galicia" e destacou que "estarán acompañados de público practicamente en todo o percorrido", sinalou o edil que recordou que o seu departamento "sempre vai apoiar este evento, que expresa valores tan positivos como a superación, o compañeirismo, a cooperación, o esforzo e a consecución de metas".

Tamén mandou unha mensaxe á sociedade pontevedresa para que teña "certa paciencia coas pequenas molestias que poida ocasionar unha proba que promover a saúde, o benestar e a práctica do deporte e que é esteticamente moi bonita".

A presidenta da Ximnástica pediu á xente de Pontevedra "que saia á rúa para participar desta xornada festiva". Pola súa banda a directora de área de CaixaBank, entidade que leva catro anos patrocinando a carreira, afirmou estar sorprendida co incremento de participación.