Este sábado, a cidade do Lérez volverá vivir o balonmán pontevedrés en pleno esplendor. Aínda que a liga de División de Honra Prata fai parón, o Cisne Colegio Los Sauces e o Condes de Albarei Teucro poderán ofrecer ás súas respectivas afeccións un verdadeiro espectáculo en forma de derbi, o sétimo oficial da historia dos dous clubs e o primeiro dos tres que se xogarán esta tempada. O partido do sábado corresponde á primeira eliminatoria da Copa do Rei 2020.
Quizais esta tempada se poida chegar a volver repetitivo o enfrontamento entre os dous equipos pontevedreses, xa que en pretempada víronse as caras tamén nas semifinais da Copa Galicia. Con todo, o deste sábado será especial xa que a cidade volverá respirar o ambiente de derbi dúas tempadas despois. De novo volverá ser o pavillón Municipal o escenario escollido para acoller un evento que os amantes do balonmán pontevedrés denominarían histórico pola súa transcendencia.
Cabe recordar que na tempada 2016-2017, o equipo cisneísta e o teucrista volveron enfrontarse nun partido oficial despois de máis de tres décadas desde o primeiro. E é que aquela tempada, o descenso do Teucro a División de Honra Prata causou que os dous conxuntos se volveran atopar no camiño.
O primeiro derbi oficial produciuse o 14 de novembro de 1982, un encontro ao que o Cisne chegaba como líder da clasificación de Primeira Nacional (a actual DHP) e o Teucro facíao en segunda posición. A rivalidade existente entre os dous clubs da cidade, que ata a data se limitaba a partidos amigables e torneos, nese momento tomou unha nova dimensión.
Por outra banda, o último partido oficial que enfrontou aos dous persoais do Lérez foi o 4 de marzo de 2017, no que sería o derbi máis emocionante ata a data, xa que o Cisne logrou empatar o encontro na recta final. Ademais, este resultado foi o mellor que conseguiu o equipo cisneísta en competición oficial ante os azuis, xa que nos anteriores enfrontamentos o Teucro foi o que levou o triunfo.
Do 2017 a agora, as cousas cambiaron moito nos dous clubs, sobre todo no Teucro. Mentres que o Cisne continúa con practicamente os mesmos xogadores nas súas filas que aquela vez, o conxunto de Luis Montes sufriu un cambio radical este verán. De feito, ningún dos actuais xogadores teucristas viviu un derbi oficial ante os de Jabato, que este sábado chegarán pletóricos ao Municipal pola gran vitoria cultivada na liga ante o Alarcos Cidade Real.
