O Condes de Albarei Teucro ten a alerta vermella activada. Tras os últimos encontros da primeira volta, nos que o equipo estivo afectado polas numerosas baixas, o bloque pontevedrés continúa en tensión pola lesión de Juan Quintas, que segue arrastrando molestias no ombreiro. De feito, o pivote ourensán está pendente dunha resonancia que mostrará o alcance da súa lesión.
Aínda así, isto podería xerar un problema para os teucristas, que continúan coa procura dun goleador que dea calidade ofensiva ao persoal. De non atopalo, e coa lesión de Quintas, o Teucro volvería estar collo tanto na faceta ofensiva como na defensiva, a pesar da recente fichaxe de Vicente Poveda.
Con respecto á súa lesión, o ourensán explica que na últimas semana "estiven a traballar pola miña conta, aínda que non estou recuperado ao cento por cento. Agora hai que ir vendo como van os adestramentos e ir aos poucos, sesión a sesión. A ver como avanza o ombreiro e a ver se podo meterme con todos canto antes".
Quintas estivo traballando baixo a supervisión do preparador físico, Toño Puga, e do fisioterapeuta, Javier Martín, que me mandaron facer exercicios para intentar fortalecer o ombreiro e para ir vendo como avanza a lesión. As sensacións que teño son boas, pero claro, agora toca esperar, porque non é o mesmo traballar pola túa conta facendo rehabilitación que meterche co grupo".
Con respecto á dúbida de se poderá chegar ou non ao primeiro encontro de liga, Quintas móstrase optimista e destaca que "espero poder chegar ao primeiro partido, aínda que non podo dicir se si ou se non, pero espero que si. Quero estar canto antes e se o corpo técnico veme ben e as miñas sensacións son boas, pois me incorporarei ao grupo e a ver se tamén podo xogar os partidos de pretemporada. Aquí o primeiro que quere empezar son eu". O Teucro xogará o 26 de xaneiro un amigable ante o Ademar en Lugo.
