domingo. 15.09.2019 |
El tiempo
domingo. 15.09.2019
El tiempo

Alfredo Mejía, o enviado de Igor

Alfredo Mejía, presentado o xoves en Pasarón. DAVID FREIRE
Alfredo Mejía, presentado o xoves en Pasarón. DAVID FREIRE
▶  O maior da saga de Souza Fonseca recomendou ao internacional hondureño a súa fichaxe polo Pontevedra
▶ O novo centrocampista granate non poderá debutar contra o Coruxo, ao non dispor aínda do tránsfer internacional

"Non o dubidei. Mirei todo en Internet, falei con Igor e a decisión foi rápida. Había outra oferta en Grecia, pero quería unha nova experiencia". Así explicaba o xoves Alfredo Mejía os motivos da súa fichaxe polo Pontevedra. O internacional hondureño compartiu vestiario no Panthakrikos heleno co maior da saga De Souza, un dos máis brillantes futbolistas da historia do Pontevedra. E o ariete brasileiro reveloulle todo o que atoparía na ribeira do Lérez.

"Teño moi boas referencias do club e da cidade. Igor faloume marabillas de todo isto. Consúlteo coa miña familia... E agora estamos contentos de poder tomar un novo rumbo", expresou o medio centro na rolda de prensa da súa presentación, minutos antes de saltar ao céspede para participar no seu primeiro adestramento co Pontevedra Club de Fútbol.

"En menos dunha semana chegamos a un acordo. A decisión foi fácil para min. Coñezo os obxectivos do club e agora espero integrarme canto antes para poder loitar polas súas metas".

O centrocampista granate non poderá debutar contra o Coruxo, ao non dispor do tránsfer internacional

O seu rostro deixou entrever certa emoción na súa posta de longo como novo soldado de Luismi. "É unha honra, unha bendición poder formar parte desta familia, deste club".

Ten moitos valores propios dun guerreiro. "Intento dalo todo, ser avezado, axudar ao meu equipo. Sempre me caractericei por ser un bo compañeiro", significou o centrocampista, do que xa se relatan lendas nas que se describe o seu forte carácter. "Iso din. Espero poder axudar con ese carácter. Imos esixirnos para estar á altura do que esixe o club".

O xogador vai entendendo en que consiste pertencer ao Pontevedra. "Sei que hai moita afección aquí e que é esixente. Demostráronmo nas redes sociais". De momento deberá ter paciencia para debutar. E é que non poderá actuar mañá no partido contra o Coruxo, debido a que non dispón do tránsfer internacional. Ademais, o seu estado físico aínda non é o óptimo, xa que leva sen competir desde a primavera. "A liga en Honduras concluíu en maio e desde entón non puiden xogar e estiven traballando co preparador físico da selección de Honduras", comentou con honestidade.

Roberto Feáns dixo del que "é un 6 ou un 8. Ten percorrido para poder realizar aparicións nas dúas áreas. Vén achegar oficio, a sumar. é unha peza que nos encaixa", explicou na primeira aparición pública da súa última adquisición.

O hondureño chega ao club de Pasarón por un período de unha tempada con opción a unha segunda. "Tivémolo claro con el, á marxe de que no mercado sempre tes varias posibilidades", aclarou a responsable da área deportiva do consello de administración granate, ao que non cesaron de chegar ofertas de futbolistas nos últimos días do mercado. "Mejía cobre as necesidades que temos", asegurou Feáns, sabedor da importancia dun centrocampista que abarque moitos metros e poida xogar un papel importante con e sen balón.

Pola súa banda, a presidenta do Pontevedra Lupe Murillo, que exerceu de mestra de cerimonias no acto, recoñeceu que "esperamos del que dea o mellor que ten como xogador".

O equipo granate exercitouse o xoves en Pasarón para realizar a última sesión no campo no que levará a cabo o duelo do sábado. Luismi disporá de todos os seus efectivos excepto o lesionado Álex González.

Alfredo Mejía, o enviado de Igor
Comentarios