Álex Pereiro chegou á Sociedade Deportiva Teucro para botar unha man na pelexa pola salvación e, o pasado fin de semana debutou en División de Honra Prata demostrando que a súa adaptación á categoría e ao equipo está a ser fácil, un factor motivado polo feito de xogar co seu irmán, Samu Pereiro, e de coñecer con anterioridade a gran parte do persoal.
"En canto a vestiario atópome moi cómodo, ao final son xente moi nova e é fácil introducirse no grupo", asegura Álex Pereiro que engade que en canto ao estilo de xogo "estou a me adaptar xa que é totalmente diferente ao que tiña na Cañiza, pero estou niso".
Parte das facilidades que tivo o central veñen dadas pola presenza do seu irmán no equipo xa que "el íame contando, sempre falamos de balonmán, cada xornada, aínda que é totalmente diferente o que che contan a vivilo".
O pasado sábado, fronte ao Málaga, Pereiro disputou os seus primeiros minutos coa camiseta azul, un encontro no que se viu que a súa adaptación está a ser máis que correcta e, ademais, a gran afinidade que ten sobre a pista co seu irmán, un feito que o propio central non nega. "A min gústame xogar con el. De feito ao compartir opinións, pensamos dun xeito moi similar, entendemos o balonmán dunha forma parecida", explica o xogador azul que considera que iso "na pista pódese chegar a notar, xa que nos coñecemos máis, eu vou saber o que vai facer el e viceversa".
Álex Pereiro chegou ao Teucro para sumar na pelexa pola salvación, unha loita que está a ser moi dura para os azuis e sobre o que o central asegura que "somos un grupo que temos calidade dabondo para salvarnos e é cuestión de ter algo de sorte. O equipo está motivado, ninguén vai a medio gas".
Cada fin de semana é unha final da Champions e hai que saír a morrer para sacar os dous puntos
A pesar de que afirma que "sabiamos que ía ser difícil e estamos nunha situación bastante crítica xa que moita temos presión agora mesmo", o central destaca que para todos "cada fin de semana é unha final da Champions e hai que ir morrer para sacar os dous puntos".
O novo xogador azul enfrontarase este fin de semana ao seu primeiro desprazamento co Teucro, un duelo ante a sorpresa do grupo, o Trapagaran, que pasou con cero puntos e "vén dun refacho de tres vitorias seguidas na segunda fase, contra equipos moi bos".
Unha nova oportunidade para puntuar e unha nova ocasión para Álex Pereiro de sumar minutos, seguir crecendo e demostrar que a súa adaptación foi total.
