Este xoves sorteouse o calendario da nova tempada de Terceira División, que deparou que o Arousa comece a liga contra o Arenteiro, a priori, un dos equipos máis fortes e chamados a pelexar pola primeira posición na primeira fase.
Os pupilos de Rafa Sáez debutarán na Lomba recibindo ao bloque de Ourense, comezando contra o que está chamado a ser o seu rival a bater na pelexa polo ascenso a Segunda B.
O sorteo tamén deparou que o Ribadumia, na súa volta a Terceira División, comece a primeira xornada lonxe da Senra. Máis concretamente o equipo aurinegro visitará ao Ourense CF, un conxunto que o pasado mes de xullo estivo a piques de lograr o ascenso, pero que sufriu unha gran renovación perdendo a grandes nomes do curso pasado.
Choco, Lavercas e Estradense recibirán a Rápido de Bouzas, UD Ourense e Barco na primeira xornada que se xogará o 18 de outubro
O resto dos clubs da zona de Pontevedra arrincarán en casa. As Lavercas recibirá ao outro Ourense (a Unión Deportiva), mentres que o Choco enfrontarase en Santa Mariña ao Rápido de Bouzas. Para rematar o Club Deportivo Estradense arrincará o curso recibindo ao Barco, outro dos equipos que o pasado curso estivo a pelexar por subir de categoría.
O primeiro derbi do ano chegará pronto, na segunda xornada de liga que se disputará o 25 de outubro. A Senra acollerá o duelo entre o Ribadumia e o Choco, nunha xornada na que o Arousa visitará ao UD Ourense; as Lavercas ao Barco e o Estradense ao Pontellas.
A primeira fase desta nova Terceira División, finalizará o 21 de marzo e dará paso ás fases nas que os equipos empezarán a loitar por obxectivos máis específicos.
O Arousa pechará a primeira fase en casa e farao recibindo ás Lavercas no que, a priori, é un dos duelos máis atractivos da última xornada. Moi lonxe de Vilagarcía, o Ribadumia visitará O Espiñedo para pechar a primeira fase enfrontándose ao Arenteiro.
Para rematar o Choco terminará en Santa Mariña recibindo ao Pontellas e o Estradense no Municipal da Estrada fronte á UD Ourense.
Outras datas a ter en conta son as correspondentes á xornada 4 na que o Ribadumia recibirá ao Estradense. Sete días despois os de Luís Carro disputarán outro derbi. Nesta ocasión a domicilio ante o Alondras de Jorge Otero.
O 29 de novembro (xornada 7) o Estradense recibirá ao Choco no Municipal da Estrada e unha semana despois (xornada 8) os de Gonza Fernández ao Alondras en Santa Mariña.
Decembro será un mes de derbis para o Arousa xa que na xornada 9 (o 8 de decembro) recibirá ao Estradense; visitará ao Ribadumia unha semana despois e finalizará no Morrazo contra as Lavercas.
Durante o sorteo do calendario de Terceira aproveitouse tamén para sortear as semifinais da Fase Autonómica da Copa RFEF.
O Club Deportivo Estradense xogarase o pase á final fronte ao Silva o próximo 27 de setembro. No outro lado do cadro enfrontarase o Pontellas contra o Rápido de Bouzas. Os dous equipos que consigan imporse nas semifinais, disputarán a gran final o 4 de outubro.