Os catro fantásticos españois do K4 500, Saúl Craviotto, Marcus Cooper, Carlos Arévalo e o cangués Rodrigo Germade, colgáronse a medalla de ouro e as Antías, Jacome e Otero, a de prata en C2 200 na Copa do Mundo de piragüismo que se disputou en Szeged (Hungría).
O K4 500 español, na súa última competición antes dos Xogos de Tokio, deixou claras as súas aspiracións para a cita olímpica dominando con claridade a proba. A segunda praza foi para Alemaña cun tempo de 1:22.80 e a terceira, para Bielorrusia xa máis lonxe con 1:23.93.
As pontevedresas Antía Jacome e Antía Otero colgáronse a medalla de prata na final de C2 200 cun tempo de 46.03 segundos, só por detrás da dupla rusa que fixo 45.23.
Jacome e Otero apenas unha hora antes participaran na final de C2 500 metros na que foron sextas cun tempo de 2:05.95, lonxe de Ucraína que venceu a proba con 2:00.72. A medalla de prata é unha escasa recompensa tras a decepción de non lograr praza olímpica, tamén en Szeged.
Isabel Contreras na final A de o K1 feminino 500 metros, acabou na sexta posición cun tempo de 1;58.20, a pouco máis dun segundo das medallas. A serbia Milica Novakovic foi a vencedora con 1:56.67.
Francisco Cubelos e Íñigo Pena, en K2 1000 metros, gañaron a Final B cun tempo de 3:18.12, por diante da embarcación serbia (3:19.31) e da húngara (3:19.40).
