O Pontevedra 2018-19 comezou coas mesmas dúbidas coas que finalizou a tempada anterior. A primeira derrota da liga, a domicilio, reincide no mal hábito dos últimos tempos do conxunto que dirixe Luismi Areda: a súa dificultade para gañar lonxe de Pasarón.
A derrota contra o Unionistas de Salamanca pon de manifesto as complicacións que o once da cidade do Lérez ten a domicilio desde que regresou á Segunda División B. Iso si, é cedo aínda para saber se os tropezóns en chan castelánleonés foi un asunto pasaxeiro ou se, pola contra, responde a unha tendencia negativa que dá continuidade ao nefasto rendemento como visitante que tivo o Pontevedra nas dúas tempadas anteriores.
En Salamanca, o conxunto granate foi incapaz de materializar en ocasións os momentos nos que levou a iniciativa do xogo, nos primeiros minutos do duelo. Co marcador en contra careceu de respostas ante a boa formulación do seu adversario. Só inquietou ao Unionistas no tramo final do duelo, cando os locais cederon metros para defender o marcador e Luismi puxo máis mordente sobre o céspede coa incorporación ao seu once de Mouriño e Álex González.
Desde que regresou a Segunda B, o Pontevedra sumou 13 vitorias e 16 empates nos seus 59 partidos de Liga a domicilio
Desde que retornou a Segunda B en 2015, o Pontevedra sumou 13 vitorias e 16 empates en 59 partidos como visitante, o que supón que se quedou sen puntuar na metade dos enfrontamentos que disputou lonxe de casa nas últimas campañas.
Dos tres exercicios anteriores, o mellor foi o primeiro deles, no que o colectivo, entón dirixido por Luisito, sumou 24 puntos a domicilio, grazas a un balance de seis triunfos, seis igualadas e sete derrotas. O bo nivel exhibido en boa parte do campionato permitiu ao Pontevedra pelexar por unha praza de promoción de ascenso durante dous terzos do curso.
Na pasada campaña, sumou tres dos seus catro triunfos lonxe de Pasarón nos dous últimos meses da competición
Á campaña seguinte, na 2016-17, o cadro da cidade do Lérez fíxose con tres triunfos e seis igualadas. O bloque granate foi un dos mellores locais de España, pero o nivel que ofreceu en Pasarón contrastou rotundamente co dos desprazamentos. O PCF meteuse na promoción logo de tres triunfos lonxe de casa e seis igualadas.
2017-18. O balance do pasado exercicio foi peor, ata o extremo de que estivo a piques de facer caer na desesperación á afección, tomada polo pesimismo a medida que se achegaba o final.
Con todo, o refacho lonxe de casa pareceu cambiar nos últimos dous meses de campionato, cando o Pontevedra foi capaz de vencer dous partidos consecutivos, contra o Navalcarnero e o Valladolid B, e pechou o exercicio triunfando ante o Atlético de Madrid B. O Pontevedra obtivo catro vitorias e tres igualadas en toda a liga que o axudaron a evitar o descenso de categoría.
O comezo en Salamanca non foi esperanzador, tanto polo resultado como pola imaxe ofrecida polo Pontevedra. Con todo, o equipo granate ten unha tempada enteira para demostrar que a derrota ante o equipo dirixido por Roberto Aguirre foi un caso illado.
