Samu Pereiro e Diego Prada soben o último chanzo. O lateral esquerdo porriñés e o extremo zurdo da Coruña formarán parte do primeiro equipo a partir da próxima tempada. Ambos os xogadores tiveron minutos ao longo da última tempada na liga Asobal a pesar de ter ficha coa filial e agora, co descenso de categoría, o club cre conveniente darlles un posto no primeiro cadro.
Deste xeito, o Condes de Albarei continúa obtendo beneficios da súa aposta por fichar xogadores prometedores para os seus equipos de canteira. Samu Pereiro acumula varias tempadas en Pontevedra e esta última tivo minutos nos 30 partidos da máxima categoría. O lateral esquerdo, de 22 anos, anotou 20 goles no seu segundo curso con experiencia en Asobal.
Mentres, Diego Prada contou con menos peso nos plans de Luis Montes, pero as súas boas actuacións na filial acabaron por conducirlle a ser un xogador habitual nas convocatorias a partir de xaneiro. O extremo herculino participou en 13 encontros e anotou seis tantos.
Remeseiro, David Rey e Jacobo Río, dacabalo entre Prata e Nacional
Prada, de 21 anos, chegou o pasado verán ao club azul procedente da Academia Octavio de Vigo logo de anotar 96 goles en 29 partidos en Primeira Nacional. Este curso, mellorou aínda máis os seus rexistros e logrou 137 tantos co Teucro Colexio San Narciso nos 27 partidos que disputou. é dicir, logrou unha media de 5,07 por partido.
Este rendemento permitiulle ter minutos no primeiro equipo a pesar de ter por diante no seu posto a Iván Fernández e a Carlos Gehrhardt. Ao seu maior peso nos plans de Montes contribuíron as lesións de ambos os xogadores, especialmente do primeiro deles, que se mantivo apartado durante bastantes xornadas das pistas polos seus problemas de xeonllo. Así, Prada será unha das opcións principais de Montes para o extremo esquerdo.
Samu Pereiro e Diego Prada compartiron con Sergio Pérez e Domingo Luís principalmente a súa condición de xogadores dacabalo entre o primeiro equipo e a filial. E agora que ningún deles continúa na mesma circunstancia, o Teucro xa conta con outros nomes para exercer de xogadores de Prata cando sexa necesario, aínda que con ficha doB . Serán Cristian Remeseiro, David Rey e Jacobo Río.
Remeseiro xa tivo ese rol o pasado curso e aos seus 18 anos, espérase que poida seguir progresando no seu segundo ano como azul. Mentres, Jacobo Río ascende desde o Xuvenil teucrista e é unha aposta importante do Teucro. Pola súa banda, David Rey, formado no club, estivo cedido o pasado curso no Chapela e anotou 118 tantos en Primeira Nacional. Os tres son xogadores de primeira liña, aínda que Remeseiro xogou en Asobal como extremo.
