Os socios do Pontevedra o pasado curso terán o asento e a asistencia a Pasarón garantidos esta tempada. Así o anunciou este xoves a presidenta do club, Lupe Murillo, durante a presentación dunha campaña de abonados que arrinca este venres con preferencia, precisamente, para aqueles que se sacaron en 2019 o último carné.
O PCF conseguiu que as autoridades sanitarias haxan dado luz verde a un protocolo de asistencia ao seu estadio para os partidos oficiais que prevé a entrada dunhas 2.400 persoas, o número de socios que o club tivo durante a última e inacabada tempada. "Todos os nosos socios van estar en Pasarón", anunciou Murillo, que recalcou o moito que tiveron que "pelexar" para que se permita a asistencia dese número de afeccionados. "Primeiro eran 500 e pelexámolo. Logo, 1.000 e pelexámolo tamén. Traballamos moitas horas nun protocolo que permita a entrada dese número de persoas. Pasarón será un estadio seguro", recalcou.
A pesar desta estimación, a día de hoxe o PCF non ten claro que número de persoas poderán acudir exactamente ao seu estadio. Desa cifra e da de renovacións nos primeiros dez días da campaña de abonados dependerá a posibilidade de concretar altas novas de interesados en facerse abonados. E é que aqueles que o pasado curso non se sacaron o carné deberán agardar, xa que hoxe arrinca a campaña unicamente de renovación.
"Traballamos moitas horas nun protocolo que permita a entrada. Pasarón será un estadio seguro"
Así, entre este venres e sábado, os socios do 1 ao 400 terán a posibilidade de manter o seu abono e elixir o lugar onde queiran situarse. De feito, poderán cambiarse de bancada se así o desexan. A partir do martes 13 ábrese o prazo para os abonados do 401 ao 800. E así sucesivamente ata o 19 de outubro, cando os socios antigos perderán esa preferencia con respecto a aqueles afeccionados interesados nunha nova alta. Para dúbidas, está habilitado o teléfono 986103819.
A partir do 19 de outubro, o club empezará a asignar asentos aos interesados en ser "novos socios". Para iso, os interesados deben facer unha pre reserva enviando os seus datos ao email [email protected] desde xa. A partir do citado 19, e en función do aforamento dispoñible, o club porase en contacto cos integrantes desta lista de espera -a orde será por rigorosa hora e data de chegada- para certificar o seu abono en función do aforamento dispoñible.
PREZOS. En canto aos prezos dos abonos, o club mantivo os prezos para o público xeral en Tribuna (220 euros) e Preferencia (150). Mentres, os Fondos deixan de dividirse en dous e sofren unha lixeira subida de 20 e 10 euros (100). En canto aos socios novos, os maiores de 17 anos deberán pagar 245 en Tribuna, 180 en Preferencia e 120 en Fondos.
Doutra banda, o Pontevedra mantén a opción Baby e puxo en marcha a opción Corazón Granate para aqueles maiores de 65 anos que pretendan manter o seu número de socio pero non vaian acudir ao estadio.
