Bea Gómez Cortés deixou escapar a medalla de bronce este sábado na final de 200 metros estilos no Campionato de España Absoluto de Inverno Astrapool, que se está disputando en Barcelona. Nesta ocasión, a nadadora do Club Natación Galaico Pontevedra, quedou en cuarto lugar quedándose a menos de medio segundo da medalla de bronce.
Bea Gómez Cortés, que se clasificou para esta final co segundo mellor tempo de todas as participantes, a pouco máis de dous segundos da primeira, realizou unha boa carreira na que se mantivo moi regular durante todo o percorrido, polo menos durante as disciplinas de bolboreta, costas e braza. No último tramo de carreira, durante a disciplina de croll, a pontevedresa deixouse ir nos último metros, perdendo así as opcións a conseguir a medalla de bronce, que finalmente foi para Paula Juste, que terminou cun tempo de 2:14.36.
A medalla de ouro foi para Catalina Corro, que se clasificou para esta final co mellor tempo e que non fallou á súa condición de favorita. Corro terminou esta final cun tempo de 2:09.46, sacándolle dous segundos de vantaxe a María García que conseguiu a medalla de ouro finalizando en 2:11.41. Con esta medalla Catalina Corro completa un gran campionato no que destacou dun xeito espectacular sobre o resto de nadadoras.
Tamén na tarde deste sábado disputouse a Final B de 100 metros costas, coa presenza de Dani Sánchez que terminou en terceira posición cun tempo de 55.26 segundos. O nadador realizou unha gran actuación que, a pesar de non optar a medalla nesta Final B, realizou unha gran carreira, loitando ata o final. Finalmente levou a terceira praza pero estivo apunto de arrebatar a segunda posición nos últimos metros de carreira.
Este domingo é o último día de competición do Campionato de España Absoluto de Inverno Astrapool o que, tanto Bea Gómez Cortés como Dani Sánchez, probarán sorte na xornada matutina en disciplina de 50 metros libre, onde intentarán lograr o pase á final que se disputa esta tarde.
