Aprázase o partido desta tarde do Arousa por un brote de covid

Terá que esperar unha semana máis o Arousa SC para inaugurar a segunda volta da competición. A Real Federación Española de Fútbol aprazou o encontro previsto para esta tarde ante o CD Arenteiro, tras a notificación dun brote de covid no conxunto arlequinado.

Na tarde deste venres detectáronse varios casos positivos no persoal dirixido por Jorge Otero, o que levou ao equipo a dar parte ás autoridades sanitarias e á Federación. Os xogadores non presentan síntomas e atópanse gardando corentena.

O brote afecta a ata seis xogadores, polo que a RFEF optou por aprazar o partido a unha nova data, que será determinada polo propio ente organizativo axiña que como as circunstancias o permitan.

Tras o parón que experimentou a categoría a pasada semana, o Arousa segue estendendo un período atípico. O persoal arlequinado xa contara con casos de covid entre as súas filas durante as vacacións do Nadal, coa falta de xogadores marcando os adestramentos do club.

Deste xeito, os de Jorge Otero, polo momento undécimos na táboa, chegarán á décimo novena xornada ligueira tras dúas semanas sen xogar, con máis tempo para reflexionar sobre a súa derrota en casa do Bergantiños no que foi o primeiro partido de 2022, na última xornada da primeira volta.

Pola súa banda, buscará non perder o ritmo o Arenteiro, que chegaba ao encontro desta tarde con intencións de repetir a súa vitoria en casa ante o Avilés.

Os de Otero volverán á competición o próximo 30 de xaneiro, data en que recibirán ao Club Mariño de Luanco, en posicións de descenso. O Arousa intentará volver ao ritmo de xogo e recuperar o tempo perdido, para sumar tres puntos que lle fagan avanzar nunha zona media da táboa caracterizada pola igualdade.