Campos e Casal, directos ao Europeo de Piragüismo

O piragüismo pontevedrés está de celebración. E é que Ton Campos e Jenifer Casal lograron este sábado o seu billete para o Campionato de Europa de Piragüismo logo de alzarse coa vitoria na XXV edición do Campionato de España de Maratón que se está celebrando estA fin de semana no río Lérez.

Jennifer Casal, da EP Cidade de Pontevedra, foi a encargada de dar a primeira alegría para os afeccionados pontevedreses cando logrou gañar comodamente a proba C1 da categoría Senior Feminino cun tempo de 1:42:16.65, dous minutos menos que María Pérez, do CN O Muiño de Ribadumia, que acabou na segunda posición.

Bastante máis axustado foi o triunfo de Ton Campos na proba C1 Senior. O piragüista do Breogán non contou con tanta vantaxe e tivo que dar o máximo ata o final da carreira para conseguir cruzar en primeira posición cun tempo de 1:56:06.81 e lograr unha praza para o europeo que se celebrará en Moscova o 10 e 11 de xullo. Fernando Busto, do As Torres, e Manuel Garrido, do Tudense, completaron o podio.

Non houbo tanta sorte para os pontevedreses na proba de K1 Senior, na que Álvaro Fernández finalizou na sétima praza e Aarón Dieguez non puido acabar a proba.

Doutra banda, a categoría Sub 23 trouxo consigo tres vitorias máis nesta xornada inicial. Na proba de C1 Sub-23, Álvaro Fernández, da Cidade de Pontevedra, foi o vencedor cun tempo de 1:45:42.74, mentres que o seu compañeiro, Álvaro López, ocupou o terceiro caixón do podio por detrás de León Villalba, do Aranxuez.

No C1 feminino, a gañadora foi Noelia Sánchez do Club Madrileño Ciencias (1:34:38.35), seguida de cerca por Ana dA Fonseca do Náutico Pontecesures (1:35:01.94) e María Esarte do Natación Pamplona que chegou terceira dous minutos despois.

E como non hai dous sen tres, se no C1 a Cidade de Pontevedra fixo un moi bo papel, no K1 Sub- 23 tocoulle a quenda ao Verducido. A súa dupla conformada por Joaquín Igrexas e Adrián Prada foron unha auténtica apisoadora para ocupar as dúas primeiras posicións respectivamente.

Nas categorías inferiores, Martín Expósito conseguiu o mellor resultado dos pontevedreses ao acabar en segunda posición na proba C1 de cadete. Outros piragüistas como Noe Romeu e Ana Costas acabaron dentro do top 10 nas súas respectivas carreiras.

Tras a estrea triunfal, este domingo segue o campionato e haberá que ver se a dupla do Verducido (Joaquín Igrexas e Adrián Prada) e a da Cidade de Pontevedra (Jaime Duro e Álvaro López) conseguen gañar nas probas de K2 e de C2.