Samuel Santos Samu (Redondela, 2000) non llo pensou demasiado cando recibiu a chamada desde as oficinas de Pasarón. ''Cando un equipo como o Pontevedra che chama é moi difícil dicir que non'', recoñece. Procedente do Choco, equipo ao que recoñece ter ''moito aprecio'' xa que é o seu club ''de toda a vida'', Samu asinou dúas tempadas co conxunto granate e chega para cubrir unha das fichas sub-23.
A oferta do equipo do Lérez era difícil de rexeitar, tendo en conta que o Pontevedra ''é un club máis profesional e que xoga nunha categoría superior'' á do Choco.
As negociacións co club que preside Lupe Murillo foron ''moi rápidas''. ''Chamáronme dicíndome que tiñan interese en que fose xogar alí e a verdade é que non o dubidei'', apunta. O mercado de fichaxes do Pontevedra CF este ano non está a deixar indiferente a ninguén, coas saídas de nomes transcendentes como Luisito ou Adrián Cruz. Con todo, Samu asegura que as súas conversacións co club foron ''un gusto e o trato excelente''. ''Explicáronme como ía ser todo'', engade.
O mozo central é un das tres fichaxes que o conxunto lerezano anunciou para a próxima campaña en Segunda RFEF. A renovación do vestiario do Pontevedra está este ano en mans de Toni Otero, o novo director deportivo, quen ten claro que a mocidade é o eixo do novo proxecto granate.
Otero xa encomiou as calidades futbolísticas de Samu, e o xa xogador granate coincide co directivo en que o seu xogo aéreo é un dos seus ''puntos fortes''. ''Son alto e non teño medo nas disputas'', expresa o defensor. Aínda así, o futbolista móstrase humilde e asegura non poder ''garantir'' que achegará algo en especial: ''O único que podo asegurar é que vou dalo todo''.
O certo é que con tan só 21 anos o mozo de Redondela chega ao equipo cunha actitude inmellorable. ''Este ano vou a Pontevedra coa idea de aprender moito dos meus compañeiros, de mellorar e de intentar achegar o máximo que poida ao equipo, xa sexa no campo, no banco ou na bancada'', expresa.
Aínda que non fixeron falta moitas reunións para convencer a Samu de que vestise as cores do Pontevedra a próxima campaña, os plans do combinado granate de apostar por un equipo novo acabaron de convencer ao central. Para Samu ''a mestura entre mozas e veteranos é o
A incoporación do futbolista de Redondela é unha clara aposta de Toni Otero, que asegurou seguir o xogo do mozo central durante o seu paso polo Choco. Samu non quere desaproveitar a oportunidade que o novo director deportivo do conxunto granate bríndalle, e espera ''coller moita experiencia e vivir moitos momentos bonitos''.
Ante a posibilidade de debutar este ano co club granate en Segunda RFEF -a antiga Segunda B-, o central móstrase entusiasmado e agradecido. ''Poder xogar nesa categoría é un privilexio, moita xente querería estar no meu lugar e eu valoro a sorte que teño de poder facelo'', matiza. Disposto a aproveitar a oportunidade que se lle presenta este ano, Samu recoñece que ''moitas persoas que llo merecen nunca chegan a xogar nesta división e eu teño a posibilidade de facelo''.
A súa mocidade é un dos seus puntos fortes e o central confía en que aínda queden ''bastantes anos xogando ao fútbol''. ''Si que espero que o meu paso polo Pontevedra sexa bonito e que sobre todo me sirva para aprender e oxalá xogar moitos partidos'', engade.
A renovación no vestiario non é algo que preocupe demasiado ao novo xogador granate: ''Non seguín moito a tempada da Segunda B o ano pasado, non sigo moito fútbol pero dentro do pouco que se, hai moi bos xogadores no club e á vista está''. Aínda así, o mozo central está seguro de que ''os reforzos nunca están de máis''.
Incerteza. Uns reforzos que non chegaron aínda en forma de adestrador, algo que a Samu xeroulle ''un pouco de incerteza''. ''Ao final non sabes se lle vas a gustar ao adestrador ou se podes achegar o que pide el'', di.
Aínda así o novo futbolista espera grandes resultados desta tempada ante a afección en Pasarón. ''Espero que o equipo faga unha boa tempada e que consigamos todos os obxectivos que nos marquen'', finaliza.
Aínda que o Pontevedra CF está a revolucionar por completo o seu vestiario, o resto de equipos que competirán en liga co conxunto granate tamén están a xogar as súas cartas no mercado de fichaxes estival.
Os rivais do Pontevedra moven ficha no mercado de fichaxes
O Coruxo Fútbol Club e o Arousa foron os dous últimos equipos en confirmar novo adestrador para os seus bancos na próxima campaña 2021/2022. Unha tarefa, a de buscar adestrador, que aínda ten pendente un Pontevedra ao que os rivais apertan no mercado.
O equipo de Vilagarcía xa confirmou a renovación de dúas dos seus xogadores, Xullo Rei e Sidibé. Ademais, o mediocentro Diego Diz vestirá a próxima tempada as cores do Arousa en Segunda RFEF. Quen non seguirán son o excapitán granate, Adrián Gómez, e o extremo Kilian Villaverde.
Tamén a SD Compostela púxose as pilas neste mercado. O conxunto da capital galega xa ten adestrador, Rodri Veiga, e anunciou tres novas fichaxes que se suman ás incorporacións do corpo técnico. O mediocentro Fer Beltrán é o último xogador anunciado polo club. Fer chega desde o Racing de Ferrol e asinou polos próximos dous anos.
