O Grupo Deportivo Supermercados Froiz segue mostrando unhas excelentes sensacións no comezo da tempada ciclista. Na primeira proba do ano en Cantabria mostrouse moi activo, hai unha semana brillou con luz propia na o inicio da Copa de España, na que Pablo Alonso ocupa a segunda praza na categoría elite e este domingo foi, de novo, en terras cántabras onde os alimenticios exhibiron unha extraordinaria imaxe.
A formación pontevedresa participou no LV Gran Premio San José
Hai días nos que non é necesario alzar os brazos para sentirse gañadores, un deles é o do domingo para a escuadra que dirixe Evaristo Portela, xa que a proba de 124 quilómetros foi un recital de ciclismo e de traballo en equipo por parte da escuadra alimenticia, que foi unha das que mellor correu.
O Supermercados Froiz fíxose responsable da carreira desde o inicio e enfilou o pelotón durante os primeiros 70 quilómetros collendo as rendas da carreira. Todo o equipo traballou para levar diante a Pablo Alonso e a Nicolás Antorena.
Os máis novos do equipo deixáronse a pel tirando para os seus compañeiros e mostrando unha fortaleza como equipo.
A falta de tres quilómetros para meta Ramón Fernández intentouno de lonxe pero foi neutralizado e a falta de 700 metros na cabeza de carreira na que ían Nicolás e Alonso, víronse involucrados nunha caída e aínda así Nico conseguiu un noveno posto a catro segundos do vencedor da Caixa Rural, Andoni López e Pablo Alonso 29º no mesmo tempo.
O resultado non reflicte o carrerón que fixo o equipo que xa pensa no próximo reto, que será este domingo no Memorial Valenciaga que está considerada como a proba dun día máis importante de todas as que se celebran en España para a categoría elite e sub-23.
A proba eibarresa é a segunda cita da Copa de España na que o Froiz quere cambiar a dinámica dos últimos anos. O seu obxectivo é estar a loitar polos postos de cabeza das diferentes clasificacións.
Na primeira carreira disputada no País Vasco o Super Froiz ofreceu unha excelente imaxe cun Pablo Alonso moi activo. Xunto ao arxentino Nicolás Antorena son os homes fortes da escuadra alimenticia para a competición da RFEC.
