A loita comezou e non precisamente no contexto dunha guerra ou unha batalla. Desde este luns, Pontevedra converteuse no epicentro das loitas olímpicas coa celebración do Campionato de Europa júnior, no que participan 37 países e preto dun milleiro de deportistas.
FOTO: JOSÉ LUIZ OUBIÑA
O pavillón Municipal será durante toda a semana o escenario dos numerosos combates que se levarán a cabo. Este luns puidéronse ver os primeiros na modalidade de grecorromana, unha disciplina na que os loitadores só teñen permitido usar a parte superior do corpo, estando prohibido, polo tanto, usar as pernas para realizar as diferentes chaves e proxeccións.
Desde as 11.30 horas, logo dos pertinentes exames médicos, os primeiros loitadores saltaron aos tatami —no Municipal hai tres instalados— para disputar os primeiros combates correspondentes ás roldas clasificatorias dos pesos 55, 63, 77, 87 e 130 quilogramos.
Os primeiros en competir foron os de menor peso. Entre eles estaba un dos españois favoritos a optar polas medallas, Aser Ebro. Non tivo fortuna nas roldas clasificatorias, xa que se enfrontou ao ruso Anvar Allakhiarov, que gañou por 9-0. Aínda así, Ebro terá unha nova oportunidade de subirse ao podio xa que compite este martes pola repesca ante o macedonio Artium Deleanu. En 55 quilogramos loitarán polo ouro dous dos paises con máis tradición nesta disciplina, Rusia e Xeorxia, mentres que na disputa polo bronce esperan Ucraína (posible rival de Aser Ebro se gaña a repesca) e Acerbaixán.
Xeorxia, Rusia, Turquía e Hungría pelexarán este martes pola medalla de ouro nas primeiras finais do campionato
En 63 quilogramos, Marcos Sánchez quedou moi lonxe de gañar na rolda clasificatoria, do mesmo xeito que José Manuel Pavón en 77. No seguinte peso que se disputou o luns (87), España tampouco foi protagonista. Tampouco o foi en 130. Iván Álvarez e Antonio García despedíronse tamén da competición nas roldas clasificatorias.
Cabe recordar que as loitas olímpicas teñen unha gran tradición nos países de Europa Oriental, que son os que máis destacan nesta disciplina e sobre todo na modalidade de loita grecorromana. Por iso, a selección española chega sen a penas obxectivos para estes días de competición e céntrase plenamente nos combates de loita libre e loita feminina, que son nos que España terá moitas máis posibilidades de subirse ao podio.
Por iso, espérase que ao longo da semana sexan máis os afeccionados españois que se acheguen a Pontevedra para gozar das loitas olímpicas e transmitir todo o apoio aos loitadores que representan a España.
A pesar de que o forte do Campionato de Europa aínda non empezou, as rúas de Pontevedra xa locen abarrotadas de estranxeiros que decidiron desprazarse ata a Boa Vila para formar parte doutra gran competición de nivel internacional. Durante o luns, o Municipal xa empezou a encher algunhas das as súas bancadas. Sen dúbida, a loita olímpica é un deporte moi atractivo e diferente, que día tras día vai collendo máis repercusión no mundo deportivo e atrae a máis seguidores.
ESPAÑA, A POLA PRIMEIRA MEDALLA. A pesar de que a primeira xornada do Campionato de Europa non foi a mellor para o combinado español, este martes ten a oportunidade de conseguir a primeira medalla. Aser Ebro (55 kg) disputa a repesca (11.30 horas) e de gañala estará presente no combate polo bronce, que terá lugar a partir das 18.00 horas.
Por outra banda, terán lugar as roldas clasificatorias de grecorromana nos pesos 60, 67, 72, 82 e 97 quilogramos, mentres que de 17.15 a 18.00 horas celebraranse os respectivos combates de semifinais. Ás 16.45 tamén se celebrará no Municipal a cerimonia de apertura do campionato, na que estarán todos os países.
"O equipo español viñamos con máis ilusión con respecto á primeira xornada. De cinco loitadores tan só un poderá disputar as medallas, os outros catro quedaron eliminados. Viñamos ao campionato con algúns favoritos, un deles Aser Ebro que loitará polo bronce, pero o resto, por sorpresa nosa caeron na primeira rolda xa", comentou o seleccionador con respecto a esta xornada.
A pesar de caer, os loitadores españois levan meses preparando esta competición, unha das máis importantes: "Este campionato prepárase a partir de que se disputa o Nacional. Prepárase en torneos, concentracións... e está entre seis e oito meses pensando xa nesta competición. Este é sen dúbida o maior torneo no que vaian participar os deportistas".
Martínez é realista con respecto ás opcións de España, xa que "neste deporte os favoritos sempre foron países como Armenia, Acerbaixán, Rusia, Ucraína. Víveno moitísimo". Aínda así, ten esperanza na xornada do martes.
