Un ano máis, o Trofeo Cidade de Pontevedra-Memorial Rogelio Acuña volveu converter á cidade do Lérez no epicentro do ciclismo galego. Máis dun centenar de deportistas quixeron tomar parte nunha cita recoñecida como a antesala da Volta a Galicia, que comeza este xoves. Martín Lestido, ciclista do GD Supermercados Froiz, proclamouse campión da competición. A escuadra alimenticia ocupou o podio ao completo con Óscar Brea na segunda praza e Guillermo García na terceira. Ademais, o Froiz levou o premio ao mellor equipo da proba.
Xa o pasado ano, o equipo de Pontevedra levou o título da competición grazas ao manchego Pedro Merino, que superou no esprint ao surafricano Willen Jakobus (Club Ciclista Rías Baixas) e a Aser Estévez (Cortizo - Anova).
A cita pontevedresa, que este ano tivo como segundo nome Volta ao Morrazo, arrincou desde a Praza de España ás 10.00 horas. Ana Portela, Anxos Riveiro e Guillermo Sande foron os encargados de dar a saída. Os participantes tiveron que completar un percorrido de 100 quilómetros que se desenvolveron por diferentes puntos da comarca: Marín, Bueu, Cangas, Moaña, Domaio, Cobre, Vilaboa, Arcade, Soutomaior, Pontecaldelas e Pontevedra, onde estaba a saída e a meta.
A carreira decidiuse nun primeiro lugar cerca do quilómetro 47 de carreira na que se produciu unha escapada formada por 14 corredores, que mantivo unha diferenza respecto ao pelotón de tres minutos. Houbo numerosos ataques diante pero non foi ata case final de carreira, a cinco quilómetros de meta, cando Martín Lestido e Óscar Brea fóronse do grupo de cabeza entrando finalmente en solitario en liña de meta.
A chegada da carreira, a Praza de España contou cunha gran afluencia de público, que quixo aproveitar o bo tempo para gozar dunha competición que espera converterse nuns referentes co paso dos anos, xa que participan algúns dos mellores corredores a nivel autonómico e nacional.
