A situación actual provoca que todo estea condicionado, polo que unha celebración que debería ser histórica queda minimizada aínda que iso non lle resta un chisco de importancia da mesma, como é o caso da fazaña consumada polo Cisne Los Sauces que este xoves foi recibido polo alcalde, Miguel Anxo Fernández Lores e o edil de Deportes, Agustín Fernández.
Un acto, celebrado no Teatro Principal, que serviu para visualizar o respaldo do Concello de Pontevedra ao ascenso do Cisne á máxima categoría do balonmán na que competirá a próxima tempada, tal como adiantou este xornal hai uns días.
A pandemia da Covid-19 fixo que o Cisne non puidese celebrar na pista un ascenso ao que fixo méritos ao longo de toda a tempada e iso tamén condicionou as posteriores celebracións, non en balde a de onte foi a primeira oficial gozou o conxunto que adestra Jabato.
No ambiente do acto respírase a satisfacción de saber que o club pontevedrés asumirá o reto de xogar a liga Asobal logo das decisións tomadas na última asemblea da Federación Española.
Satisfacción e tamén recoñecemento en palabras do concelleiro de Deportes e do alcalde. O primeiro destacou que "un clubs como o Cisne é un orgullo. Erades o mellor equipo da categoría, daba gloria vervos xogar, conseguistes algo inesquecible", destacou Agustín Fernández que se mostrou optimista con respecto ao conxunto pontevedrés na máxima categoría.
Para o presidente do club cisneísta o ascenso a Asobal non provocará que a entidade cambie a súa filosofía e segue crendo na canteira como aceno de identidade.
O alcalde pontevedrés recalcou na importancia do deporte porque "eleva a autoestima dun país ou dunha cidade" e eloxiou ao club porque "levades unha traxectoria de xestión deportiva coherente e iso non é fácil".
O de onte non pretende ser o último acto de conmemoración do ascenso xa que o club pretende celebrar unha cea e está a traballar no desenvolvemento dun acto no que poden participar patrocinadores, colaboradores e afeccionados do club.
