O Cisne visita ao Novás nun duelo para coller ritmo

A imposibilidade de encadear dúas xornadas consecutivas na liga Asobal debido ao parón da competición pola celebración de Copa do Rei, non priva ao Dicsa Modular Cisne de continuar collendo ritmo de carreira tras o segundo confinamento ao que se viu sometido o persoal branco por un novo brote de coronavirus.

O conxunto pontevedrés desprazarase este venres ata Pavillón Municipal do Rosal, para disputar ás 20.15 horas o I Torneo Comunidade de Montes Veciñais M.C. de Santa Mariña do Rosal, que o enfrontará ao Atlético Novás, equipo que está preparado xa a segunda fase da competición na que pelexará polo ascenso á máxima categoría nacional.

Ambos os conxuntos aproveitan os seus respectivos paróns para disputar este encontro amigable que será unha gran proba de lume de face aos seus próximos compromisos. O Cisne quere volver recuperar o ritmo para afrontar a volta a Asobal con garantías de poder conseguir puntos e pelexar pola salvación tras o duelo ante o Porto Sagunto que non deixou moi boas sensacións.

O choque contará coa presenza de público e permitirá aos dous equipos a posibilidade de enfrontarse esta tempada tras a suspensión do Memorial Manuel Luaces que ía celebrarse o pasado 16 de xaneiro.