Tras a suspensión da mítica proba o pasado ano pola crise sanitaria, este domingo A Catro Picos Road Clásica Evaristo Portela volveu ser un éxito rotundo na súa cuarta edición. Unha vez máis, a homenaxe ao exciclista e actual director deportivo do GD Supermercados Froiz achegou moita alegría ás estradas de Pontevedra nun día gris, no que medio milleiro de ciclistas non quixeron perderse esta gran oportunidade de gozar dun deporte tan bonito como é o ciclismo.
A Catro Picos Road é unha proba cicloturista na que a competición queda relegada a un segundo plano. E é que os participantes acoden a ela co obxectivo de superarse a eles mesmos mentres pasan un bo intre e gozan dunha paraxe natural subindo catro dos portos máis emblemáticos e recoñecidos da contorna pontevedresa.
Esta edición contou cun percorrido renovado de 121 quilómetros (cun desnivel acumulado positivo de 2.500 metros) na proba longa de fondo que atravesaba por Moraña, Campo Lameiro, Fentáns, Cuspredriños, Ponte Caldelas, Marcón, Lago de Castiñeiras, Marín e Pontevedra. Con todo, para así adaptarse a todo tipo de deportistas houbo outra opción máis alcanzable, a proba de medio fondo que contou cunha distancia de 90 quilómetros polos tres primeiros portos.
Aínda que a cita deu comezo ás 9.00 horas na Avenida de Montero Ríos, unha hora antes xa había numerosos deportistas congregados na zona para recoller os seus dorsais e tomar unha boa posición na liña de saída.
Durante os primeiros 26 quilómetros, a proba desenvolveuse de xeito neutralizado ata chegar a Moraña, onde os ciclistas impuxeron un ritmo máis elevado mentres gozaban da preciosa contorna que lles envolvía. E é que nin a choiva foi capaz de embazar un evento tan esperado polos amantes do ciclismo que animaron aos participantes no seu intento de cumprir co obxectivo de acabar a carreira en cuestión.
Doutra banda, aínda que a Clásica é unha proba no que a competición non é para nada importante, a carreira constou de dous tramos cronometrados de escalada nos que os participantes deron o mellor de si. Mentres o primeiro comezaba no quilómetro 46 e tiña unha lonxitude de 5 km, o segundo tiña lugar no quilómetro 102 e eran 2.8 km. Dos 259 ciclistas que realizaron ambos os tramos, o máis rápido foi Juan Vidal do club Farto-BTC cun tempo de 25 minutos.
Finalmente, 292 ciclistas acabaron a proba tendo en conta as dúas opcións que existían (121 e 90 quilómetros). Desta forma, ás 14.30 horas entregáronse os agasallos dos sorteos e os trofeos aos mellores tempos en cada un dos tramos cronometrados para así concluír cunha alegre xornada de ciclismo pola natureza.
