O Club Cisne Balonmano e o Colexio Los Sauces camiñarán da man unha tempada máis. Nos últimos anos, o colexio converteuse nun apoio fundamental para a entidade deportiva pontevedresa, que poderá seguir contando coa súa axuda no curso 2019-20. A rúbrica e presentación das condicións do novo convenio e patrocinio tivo lugar o martes no salón de actos das instalacións do centro de ensino.
No acto estiveron presentes Santiago Picallo, presidente do Club Cisne Balonmano, e José Antonio Rois, subdirector xeral do Colexio Los Sauces. Ademais tamén formaron parte da presentación os xogadores e corpo técnico do primeiro equipo da entidade cisneísta.
Picallo aproveitou o acto para "dar as grazas" ao Colexio Los Sauces pola confianza e o apoio dos últimos anos e anotou que "o colexio é un espello no que mirarnos. Está entre os vinte mellores do panorama nacional e nós tamén queremos lograr o mesmo cos nosos equipos de base".
"Cremos fielmente no seu apoio e sabemos que fan un gran esforzo coas bolsas que nos dan. Ademais de ter grandes xogadores, tamén queremos ter a bos estudantes nas nosas filas e estámolo conseguindo. Grazas ao apoio do Colexio Los Sauces podemos continuar sendo un referente de base en España e queremos seguir crecendo", engadiu o presidente do Cisne con respecto ás axudas do colexio.
Santiago Picallo: Grazas ao apoio do Colexio Los Sauces podemos continuar sendo un referente de base en España e queremos seguir crecendo
Por outra banda, José Antonio Rois, subdirector xeral do colexio, destacou que "o Cisne xa está á altura de estar entre os 20 mellores clubs do panorama español. É un orgullo para nós continuar un ano máis patrocinando á entidade, xa que apostamos pola educación ligada ao deporte, onde é unha parte moi importante dentro da nosa filosofía".
Con respecto ao primeiro plantel do Cisne, que ao finalizar o acto fotografouse cos dous mandatarios nas instalacións do colexio, continúa preparándose para afrontar este fin de semana o partido de cuartos de final da Copa Galicia.
