Entre tempada e tempada, as alegrías non deixan de chegar á órbita de Pablo Dapena. O triatleta pontevedrés acaba de fichar polo Team BMC Vifit Sport Triathlon, un equipo profesional no que militan homes como Bart Aernouts (segundo no Mundial de Ironman de Kona 2018), Patrick Nilson, Chris Leiferman ou Will Clarke, entre outros.
En redes sociais, Pablo Dapena xa adiantara que se atopa con ganas "de empezar un ano infestado de novidades" e que "desde aquí ata final de ano comezarei a despedirme dos sponsors que tanto confiaron en min durante estas últimas tempadas". Todo iso vén porque a partir de agora será o seu equipo quen se encargue do tema de patrocinios, viaxes, concentracións... Iso deixará a Pablo Dapena máis tempo para centrarse tan só en adestrar.
E é que este é un paso moi importante para a carreira deportiva de Pablo Dapena, xa que se atopará baixo as directrices dun equipo profesional da envergadura do Team BMC Vifit Sport Triathlon. O inicio desta aventura comezará na sede oficial de concentracións o resort Sands Beach en Lanzarote entre o 5 e o 19 de xaneiro, aínda que a pretemporada do pontevedrés comezará dentro dunha semana e media.
O gran obxectivo de Dapena é defender o título de campión do mundo de longa distancia en Pontevedra, pero tamén intentará clasificarse para o Mundial de Ironman 70.3 en Niza.
