Caetano Horta fixo historia nestes Xogos Olímpicos de Tokio 2020 ao converterse no primeiro galego en conseguir un diploma olímpico na presente edición. O noiés de tan só 18 anos, que adestra no Centro Galego de Tecnificación Deportiva de Pontevedra, disputou na madrugada do xoves a final B do dobre scull lixeiro xunto ao seu compañeiro Manel Balastegui, logrando un sétimo posto que lles permitiu facerse co premio inmediatamente inferior aos metais.
O que foi ata agora o seu adestrador no Centro Galego de Tecnificación Deportiva, Luciano Moldovan, define a Horta como "
"é un diamante en bruto, un rapaz que ten moita calidade e adestra moi ben. Unha mestura de talento e constancia"
Moldovan dirixiu os adestramentos no CGTD con Caetano desde setembro de 2017 ata marzo deste ano, momento no que pasou a formar parte do dobre olímpico. O que é tamén seleccionador español xuvenil compartiu concentracións con Horta no equipo nacional, co que chegou a conseguir un quinto posto no dobre scull do Campionato do Mundo Júnior -sendo cadete- e un ouro no Campionato Europeo, o ano pasado na mesma categoría.
O principal obxectivo para a parella era alcanzar a final B en Tokio. Unha proba á que o galego "chegaba moi ben", a pesar de que a embarcación española "estivo practicamente un mes sen adestrar na auga remando xuntos", situación que o seleccionador nacional xuvenil considera "clave" nun bote tan novo e recentemente feito. Moldovan sente "moi contento" do traballo realizado polo seu pupilo en Xapón, xa que "a esa idade e ante todos os xigantes cos que competiu, quedar sétimo está ben", aínda que non se conforma e afirma que "podería ser mellor". E é que o tándem Horta-Balastegui disputou a última das probas ante a ausencia dalgúns equipos campións do mundo ou medallistas olímpicos que quedaron fóra dunha final "rara".
"Nos Xogos de París 2024 a intención é gañalos. Non se trata de facer unha participación digna, senón de gañalos"
Sen tempo para asimilar o alcanzado en Tokio, o técnico confía en que Horta "teña a ilusión polas nubes para París 2024", cita da que tanto Luciano como o remeiro xa falaron e que era o principal obxectivo do noiés desde hai anos. "Estamos a encamiñar toda a preparación para eses Xogos coa intención de gañalos, non de facer unha participación digna ou con moitas opcións, de gañar". Así, móstrase moi "ilusionado" para o futuro cunha parella que era "a máis nova de todos" e que "terá opcións para a próxima cita olímpica". Afirma ademais que o diploma conseguido "supón moito" para o remeiro.
Caetano deberá afrontar agora un "ano de descanso relativo", pero co ciclo olímpico máis curto do normal "debe pensar nas clasificatorias do próximo ano", sentenza Luciano.
