Consumidas seis xornadas de competición no grupo I de Segunda División B, Luismi, o adestrador do Pontevedra Club de Fútbol, só concedeu todos os minutos de xogo a dous compoñentes do persoal: o gardameta Edu Sousa e o defensa central Víctor Vázquez, "Churre". Son os que sumaron os 540 minutos que se disputaron no mes e medio de competición na división de bronce do fútbol nacional.
A presenza do cérbero tudense na once inicial do cadro granate é unha constante na once inicial pontevedrés, xa que é a xogador franquía nesa demarcación desde hai varias tempadas. Nas seis confrontacións disputadas encaixou sete goles. Os cinco equipos que conseguiron perforar a súa meta foron o Valladolid B, en Pasarón; o Navalcarnero, no Mariano González do municipio madrileño; a Cultural Leonesa en Pasarón e o Unionistas salmantino. Doutra banda, o rival do que peor recordo gardará o xogador granate será o Internacional, no Polideportivo Municipal Ángel Nieto de Boadilla del Monte, de Madrid, no que encaixou tres tantos, un deles de penalti.
Na lista de artilleiros da formación están Álex González, Javi López, Javi Pazos e o xogador navarro Arruabarrena
O pasado domingo, con todo, foi o primeiro choque no que mantivo a portería a cero fronte a un rival cualificado como o Celta B, aspirante ao play-off de ascenso. Cabe recordar, no entanto, que o bloque que dirixe Luismi non é dos equipos que máis tantos recibiu nas seis primeiras xornadas de competición. É o noveno equipo en ranking de goles recibidos na súa portería tendo en conta que a Ponferradina e o Celta son os que menos reciben, con dous tantos, ou os tres do Fuenlabrada, mentres que equipos como o Rápido de Bouzas e o Salmantino xa tiveron que buscar o balón dentro da súa portería en doce ocasións.
No caso de Víctor Vázquez, Churre, parece o seguro de vida de Luismi na zona central da defensa. Non viu ningunha cartolina amarela, co que tamén é un factor importante a destacar tendo en conta que os defensas sempre son os xogadores máis proclives a recibir as sancións dos colexiados.
O terceiro xogador máis utilizado por Luismi desde que comezou a liga na segunda quincena de agosto é o defensa Nacho Lorenzo, o lateral esquerdo do persoal granate, que xogou cinco encontros completos xa que no duelo fronte á Cultural Leonesa saíu desde o banco para suplir a outro dos defensas do persoal granate, Adrián León, no minuto 28, pero despois o pontevedrés tivo que abandonar o terreo de xogo aos 68 minutos e foi substituído por Juan, polo que completa 490 minutos.
A formación granate só logrou manter a portería a cero nunha soa ocasión, en Pasarón, ante o Celta B
Despois sitúanse David Castro, que só fallou no primeiro partido da tempada, pero a semana pasada ante o Celta B foi expulsado no minuto 67, por dobre amarela, e Kevin Presa, con tres partidos completos e que ante o Navalcarnero foi substituído no minuto 80 e ante o Internacional saíu do banco no minuto 74 en substitución de Álex Fernández, e o dianteiro navarro Arruabarrena, con tres partidos completos e 34 minutos do enfrontamento co Unionistas de Salamanca, xunto a Romay, que se perdeu un duelo e disputou 75 minutos fronte ao Valladolid B.
MOURIÑO E JAVI PAZOS. Nos seis encontros disputados, Luismi preferiu sacar desde o banco ao centrocampista Mouriño e ao dianteiro Javi Pazos, pois en tres ocasións botou man do porriñés e do marinense para ser un revulsivo na segunda parte. Tamén Álex González e Álex Fernández foron referencias para o adestrador da formación granate, pois en dúas citas saíron desde o banco.
A nivel de cómputo de realizadores, cabe sinalar que a formación da Boa Vila suma catro dianas que foron obra de Álex González (marcoulle á Cultural Leonesa), Javi López (marcoulle á filial do Real Valladolid e fíxoo desde o punto de penalti), Javi Pazos (marcoulle á Cultural Leonesa) e Arruabarrena (marcoulle ao Navalcarnero). A ver se se amplía a nómina de anotadores ante o Fuenlabrada.
