Luismi: "A eficacia nos últimos metros é fundamental"

Luismi admitiu que este domingo "é deses días nos que te dás conta de que xerando ocasións de gol e traballando o partido, ás veces non é suficiente. No fútbol a eficacia nos últimos metros é fundamental. O Pontevedra xerou máis que o Atlético Baleares, pero o Baleares con menos, levou os tres puntos".

O responsable do banco granate lamentou a pouca pegada dos seus homes. "O único que nos faltou foi o gol, porque as ocasións xerámolas contra un equipo ben armado, ben traballado, con moita experiencia, con calidade, un rival que non é fácil de bater nin de xerarlle ocasións. O Pontevedra tivo oportunidades suficientes para gañar. Pero entre o porteiro e que nós non estivemos acertados, ao final o partido decantouse cara ao seu lado", resumiu Luismi.

"O único que nos faltou foi o gol, porque as ocasións xerámolas contra un equipo ben armado, ben traballado, con calidade e con moita experiencia"

A pesar de todo, o adestrador vigués realizou unha lectura positiva. "Se as sensacións fosen outras, o grupo si que estaría amolado ou baixaría a cabeza. Os futbolistas están doídos, pero fixeron todo o posible para gañar. Traballaron, esforzáronse para que o Baleares non nos fixese ocasións e ademais fixémoslles dano. Están amolados, pero coa moral a lume de biqueira para preparar o partido contra o Oviedo Vetusta", expresou o técnico da escuadra granate.

Non puido evitar lamentar as decisións do colexiado. "As mans fose da área son fáciles de pitar, pero dentro da área, máis complicadas. Creo que o asistente salvou ao árbitro sinalando fose de xogo, porque non o era. En cambio si era unha man clara. As mans agora estanse pitando máis. Está a verse cada xornada e en calquera categoría".

"Se as sensacións fosen outras, o grupo si que estaría amolado ou baixaría a cabeza. Pero lle fixemos dano ao Atlético Baleares"

Sobre a proposta da súa escuadra, comentou que "tivemos variantes: alternamos combinación con xogo directo. O Atlético Baleares estaba ben plantado e buscabamos o fútbol máis directo para eliminar liñas defensivas e chegar de forma máis directa. O partido non era fácil e o Pontevedra deu a cara".

O técnico granate valorou o desgaste dos seus homes. "O esforzo que estabamos a realizar era grande. Íbamos a presionar, non deixabamos que o Atlético Baleares sentise cómodo no partido. Estabamos case sempre en campo contrario apertando. Tivemos opcións de pechar o partido antes, non o logramos e ao final, nun balón parado con varios rebotes... Contra iso non se pode facer nada. Cando o partido está equilibrado, a fortuna pode desfacer a igualdade. Hai situacións que non se poden controlar no fútbol".

"Cando o partido está equilibrado, a fortuna pode desfacer a igualdade. Hai situacións que non se poden controlar"

Sobre se lle afectou máis a forma de perder ou o feito de caer en casa, foi claro. "Moléstannos as dúas cousas. Viñamos dunha dinámica boa en Pasarón, onde nos fixéramos fortes e amólame pola forma de caer. Cando un equipo fai méritos para gañar, que o resultado non acompañe doe", finalizou o preparador do Pontevedra Cf.

Manix Mandiola: "Se non gañásemos non pasaría nada, porque o rival tivo as súas ocasións"

Manix Mandiola recoñeceu que "se non gañásemos tampouco pasaría nada, porque o rival tivo as súas ocasións, pero non estiveron acertados".

O técnico vasco do Baleares tamén expresou que "isto é un deporte que se mide por goles. Nós marcamos, eles non e acabouse o conto".

"Non foi o noso mellor partido, pero o resultado solapa todo. Gañamos e punto. Disto apréndese, e aprender sumando, mellor".

Sobre o árbitro, dixo que nos pitou unha falta moi discutible. "Se ma pita a favor, como así foi, pareceume clarísima. É subxectivo. Desde o banco, encima, non se ve nada. Estráñame que a xente que está detrás de nós véxao mellor".