SANXENXO. O Real Club Náutico de Sanxenxo organiza o Turismo Rías Baixas Worlds, que se celebrará entre o 14 e o 20 de xullo. A cita, que porá en xogo o título de campión do mundo da clase Vauren, congregará na vila do Salnés a máis dun centenar de regatistas vindos de todo o mundo.
Os locais Jaime e Afonso Leirós parten como claros favoritos ao triunfo final, e é que non se pode pasar por alto que eles son quen ostentan actualmente o ouro mundial. Para revalidalo, veranse novamente as caras cos holandeses Roelof e Jelmes Kuipes (prata en 2012). Na competición feminina, a pelexa estará rifada. Lucía e Laura Llópiz intentarán revalidar o título logrado en augas francesas o ano pasado.
150 persoas desprazáronse hata Sanxenxo con motivo do mundial. O Turismo Rías Baixas Worlds comezará coa regata de adestramento, á que seguirá a cerimonia de apertura oficial en Praza do Mar. A primeira manga do mundial comezará ao día seguinte, o luns día 15, a partir das 11.00 horas. Todo un aliciente que se poderá gozar desde a praia de Silgar, onde se situará o campo de regatas.
