Non todo dura para sempre e menos no deporte, onde a procura de novos talentos e o bo coidado da canteira é primordial para un club se quere manterse no máis alto co paso dos anos. Por iso, ao longo desta semana en Silleda está a levarse a cabo nas instalacións do Club TM Oroso o proxecto MiniSpin da Real Federación Española de Tenis de Mesa en colaboración coa Federación Galega. Soamente oito xogadores e xogadoras foron elixidos de distintos clubs galegos para participar neste proxecto que ten como principal obxectivo a detección de novos talentos de máximo trece anos para que nun futuro poidan formar parte da selección nacional.
Dita concentración está dividida en sete horas diarias, de 10.00 a 17.00 horas, nas que se realizan adestramentos, tanto técnicos como físicos. Ademais, os participantes gozan de charlas técnicas e tácticas dirixidas por Gorka Fernández, adestrador vasco da selección española, coa axuda dos seleccionadores galegos Miguel Rey, Valeri Malov e Nuria Castro.
Nesta terceira edición do MiniSpin, a Federación Española de Tenis de Mesa seleccionou a Emma Álvarez, xogadora pontevedresa do Club Tenis de Mesa Monte Porreiro e unha das súas grandes promesas nacidas no 2009. E é que actualmente Álvarez ocupa a terceira posición no ranking galego alevín e xa está clasificada para o Torneo Estatal que terá lugar no mes de maio en Valladolid, onde competirán os 40 mellores xogadores nacionais de cada categoría deste deporte.
Cabe destacar que o CTM Monte Porreiro é un dos berces de novas promesas nos últimos anos en Galicia. Nacho Fernández, adestrador e xogador de División de Honra do club afirmou que "sempre tratamos de mellorar individualmente a base do traballo en equipo".
Coa convocatoria de Emma Álvarez, o club xa achegou ao proxecto MiniSpin ata catro xogadores, tendo en conta as participacións de Mariña García, Laura Forte e Daniel Baena en pasadas edicións.
Polo tanto, o desenvolvemento de devandito proxecto demostra o crecemento do tenis de mesa pontevedrés e á vez potencia a práctica deste gran deporte olímpico.
