Cinco tempadas no primeiro equipo do Pontevedra, dous no filial, un ascenso a Segunda División B e tres cursos como capitán do primeiro persoal converten a Adrián Gómez nun dos referentes do Pontevedra Club de Fútbol do século XXI. O lateral dereito arxentino regresa este xoves a Pasarón para defender as cores do Rápido de Bouzas. E non pode evitar emocionarse.
"Si que é especial volver aquí. O Pontevedra deume a oportunidade de sentirme futbolista e crecer como tal. Vivín cousas moi bonitas e sentinme como un xogador recoñecido na categoría", asegura o arxentino, pleno de gratitude.
Non é a primeira vez para Adrián. Na campaña pasada, despois de saber que non continuaría no club granate e de fichar polo Rápido, a primeira viaxe que tivo que facer na liga foi á casa da súa familia. "Tocoume na segunda xornada. Acababa de irme do club e foi unha sensación estraña. Sentía que aínda pertencía ao Pontevedra. Nalgunha xogada vía a compañeiros que estaban no rival. Foron impresións raras".
Non poder renovar co Pontevedra foi un golpe duro para el naquel xuño de 2017. "Había que aceptalo, aínda que como persoa, como un pontevedrés máis, foi un pau. Pero decidín pasar páxina e empezar un ciclo novo noutro club".
E nesoutro destino estivo a piques de vivir un play-off. "O ano pasado foi incrible, un dos mellores a nivel individual, porque rozamos a clasificación para a promoción. Cando se pecha unha porta, ábrese unha fiestra".
MOMENTO. "Gustoume enfrontarme ao Pontevedra noutra situación", sostén o lateral arxentino, volvendo á actualidade, sabedor de que "o calendario é o que é e eu defendo o escudo do Rápido de Bouzas".
O cadro vigués xógase a permanencia logo de encadear unha excelente serie de resultados na segunda volta da liga. Actualmente é cuarto pola cola, a tres puntos da permanencia. Nada que ver cunha época pretérita. "Sabemos o que é estar tocados e practicamente afundidos e que moita xente non dea moito por nós. Pero agora dependemos de nós mesmos para saír do descenso e incluso evitar o play-out. Nin o Pontevedra nin ningún adversario debe confiarse ante o Rápido de Bouzas", advirte o defensor do cadro aurinegro.
A súa xente acudirá a Pasarón co corazón dividido. "Están a desexar que chegue o partido para ir ao campo. Vivo aquí, son de aquí e queren que estea aquí e recorde os vellos tempos".
E aínda que o domingo esperará derrotar aos seus ex, non pode evitar recoñecer que "o equipo merece o ascenso: a cidade, a afección, a xente que está detrás, o club, a presidenta, os xogadores... Todos. En pouco tempo, o Pontevedra vai estar onde merece".
