Ferreira deixa o Pontevedra

Pedro Ferreira deixará de ser este martes o coordinador das categorías basee do Pontevedra Club de Fútbol. O técnico pontevedrés comunicou ao responsable da parcela deportiva do consello de administración, Roberto Feáns, e á presidenta granate, Lupe Murillo, a súa intención de abandonar o seu cargo ao concluír o exercicio, o 31 de maio.

Ferreira notificou a súa determinación a ambos os dirixentes hai algunhas semanas, para permitir que a entidade puidese seguir desempeñando o seu labor coa canteira e buscarlle un substituto. O cansazo polo traballo que o técnico debeu desenvolver en diferentes frontes foi o motivo que trasladou ao consello para abandonar o seu cargo.

Era a terceira ocasión na súa vida que Ferreira ocupaba o posto de director da base do Pontevedra Club de Fútbol. O seu balance en canto a resultados foi positivo, aínda que os dous buques insignias da canteira, o Pontevedra B e o Pontevedra xuvenil, estiveron lonxe das expectativas da entidade e da afección. O primeiro debeu esperar a coñecer os descensos de Rexional Preferente para saber se conservaba a categoría en Primeira Autonómica, mentres que o primeiro conxunto xuvenil desinflouse de forma inesperada na segunda metade do campionato e quedou sen ascenso a División de Honra.

Con todo, noutras competicións o cadro da cidade do Lérez tivo moito protagonismo. O Pontevedra logrou catro ascensos: co benxamín A, os dous equipos de categoría infantil e o xuvenil B. Os tres primeiros proclamáronse campións nas súas respectivas competicións, mentres que o CD Lérez xuvenil foi subcampión, igualado a puntos co primeiro.

Ademais, o conxunto cadete do Club Deportivo Lérez logrou o subcampeonato. Ese equipo atópase inmerso na loita polo ascenso contra o Salgueiriños. No enfrontamento de ida, o Salgue impúxose por 3-1.

A chegada de Pedro Ferreira ao Pontevedra produciuse o verán pasado para substituír a Milo Abelleira. O obxectivo do novo director da base era reorganizar un departamento que estaba a ser un dos máis prexudicados polos problemas estruturais que arrastraba o club no último lustro e que se traduciron en resultados moi deficientes.

SUBSTITUTO. A entidade granate traballa na procura dun substituto para Ferreira. O candidato mellor colocado para ocupar a praza vacante parece Alberto Mariano, técnico que dirixiu ao Compostela en Segunda B durante algúns meses, entre a destitución de Iñaki Alonso e a chegada ao banco de Fredi Álvarez.

Antes e logo de ocupar o banco de San Lázaro, Mariano encargouse de dirixir ao equipo xuvenil de Liga Nacional da escuadra albiceleste. É un home afeito a traballar con futbolistas en idades de formación e que ten experiencia nun club importante de Galicia, como o Compostela.

Durante as próximas semanas poderase coñecer se o técnico santiagués alcanza un acordo coa entidade pontevedresa como novo responsable das súas categorías basee.