O Frigoríficos do Morrazo buscará referendar este sábado ante o Secin Group Alcobendas as boas sensacións ofrecidas na súa estrea ligueira, a pesar de non conseguir puntuar na cancha do Bada Huesca.
O choque ante o conxunto madrileño, recentemente ascendido á liga Asobal, está marcado en vermello no vestiario do Frigoríficos. Ninguén quere falar de final porque a liga acaba de empezar, pero vencer ao Alcobendas é fundamental para gañar en tranquilidade.
Unha vitoria que pasará por repetir o nivel defensivo exhibido en Huesca e, sobre todo, evitar as perdas de balón no ataque posicional para que o Alcobendas poida imprimirlle velocidade ao xogo, pois un dos seus puntos fortes está nas súas accións de contraataque.
O adestrador do Frigoríficos, Magí Serra, contará con todos os seus xogadores para este partido, que comezará ás 18:30 horas no pavillón do Gatañal e será dirixido polos colexiados asturiano Álvarez Menéndez e Cavada Fritise.
